Кодаш

Авыл 1747 елдан мәгълүм.

1860 елларга кадәр халкы асаба башкортлар, типтәрләр һәм дәүләт крәстияннәре катлауларына бүленә. Бу чорда халкының төп шөгыле – игенчелек, терлекчелек.

XX йөз башында авылда 2 мәчет, 2 су тегермәне эшли.

Авыл җәмәгатенең имана җире 2117 дисәтинә тәшкил итә.

1920 елга кадәр Самара губернасының Бөгелмә өязе Микулино волостенда. 1920 елдан ТАССРның Бөгелмә кантонында.

1930 елның 10 августыннан – Әлмәт, 1935 елның 10 февраленнән – Яңа Писмән, 1955 елның 18 августыннан – Лениногорск, 1959 елның 26 мартыннан Бөгелмә районында.

Хәзер Кодаш авыл җирлеге составына керә.

1929 елда авылда Кызыл Чишмә авылы белән бергә “Кызыл куак” колхозы (беренче рәисе – Миңнеханов) оештырыла, 1959 елда М.Җәлил исемендәге колхоз итеп үзгәртелә. 1991 елдан “Иркеннефть” нефть-газ чыгару идарәсенең М.Җәлил исемендәге 2 нче агроцехы, 1997 елдан “Татнефть” ачык акционерлык җәмгыятенең М.Җәлил исемендәге җаваплылыгы чикләнгән җәмгыять.

Халкы кырчылык, сөт терлекчелеге, сарык асрау белән шөгыльләнә.

1924 елда авылда башлангыч мәктәп ачыла, 1936 елда – җидееллык, 1968 елда – сигезьеллык (яңа бина төзелә), 2000 елда – урта, 2011 елда – тулы булмаган урта мәктәп итеп үзгәртелә.

Мәктәптә музей эшли (1990 елдан, оештыручысы – Н.А.Мөэминов), экспонатлар арасында мөфти Р.Фәхретдин имзалаган имам шәһадәтнамәсе (1929 ел) бар.

Хәзер авылда китапханәле мәдәният йорты (1940 елдан, 1984 елда яңа бина төзелә), балалар бакчасы (1977 елдан), фельдшер-акушерлык пункты (1958 елдан), “Миргазиян” мәчете (1996 елдан) эшли.

Төзекләндерелгән чишмә бар.

Я.Т.Газизов (1936 елда туган) – икътисад фәннәре кандидаты, профессор, ТРның атказанган икътисадчысы;

М.Г.Галиев (1911–?) – “Кызыл куак” колхозы рәисе, Ленин ордены кавалеры, авылның бер урамы аның исеме белән атала;

Ә.М.Галләмов (1921 елда туган) – полковник, Бөгелмә шәһәренең мактаулы гражданы.

1859 елда – 770,
1889 елда – 823,
1897 елда – 1317,
1908 елда – 1378,
1920 елда – 1666,
1926 елда – 1544,
1938 елда – 1161,
1949 елда – 1043,
1958 елда – 1028,
1970 елда – 920,
1979 елда – 672,
1989 елда – 538,
2002 елда – 842,
2010 елда – 744,
2015 елда – 762 кеше (татарлар).