Рус Төгәлбае

Авылга XVIII йөзнең беренче яртысында нигез салына. Революциягә кадәрге чыганакларда Бизнә исеме белән билгеле.

1860 елларда халкы алпавыт крәстияннәре катлавына керә (алпавытлар Дураков, шул исәптән А.П.Дураков – 1799 – 1800 елларда Суворов чит ил походларында катнашучы, Макаров, Стрелков, А.А.Комарова, М.П.Соколоваларга карый). Авылда шулай ук элеккеге йомышлы һәм ясаклы тататлар, шул исәптән керәшеннәр яши. Бу чорда халкының төп шөгыле – игенчелек, терлекчелек, өс-баш киемнәре тегү кәсепчелеге киң тарала.

XX йөзнең башында авылда земство мәктәбе, җил тегермәне, 2 вак-төяк кибете эшли.

Авыл җәмәгатенең имана җире 987 дисәтинә тәшкил итә.

Авыл Кошки  авылы Троица чиркәве приходына карый.

1920 елда Казан губернасының Спас өязе Кузнечиха волостена керә. 1920 елдан ТАССРның Спас кантонында.

1930 елның 10 августыннан – Әлки, 1935 елның 10 февраленнән – Кузнечиха, 1960 елның 28 октябреннән – Әлки, 1963 елның 1 февраленнән – Куйбышев, 1965 елның 12 гыйнварыннан Әлки районында.

Хәзер Кошки авыл җирлеге составына керә.

1931 елда авылда “Май” колхозы оештырыла, соңрак “Правда” колхозы составында, 1957 елда – “Правда” совхозында. 1991 – 1999 елларда “Төгәлбәй” совхозы составында була.

Авыл янында ике Имәнкискә культурасы авыллыгы һәм монголларга кадәрге чор болгар археология истәлекләре табыла.

1782 елда – 63 ир заты;
1859 елда – 385,
1897 елда – 917,
1908 елда – 433,
1920 елда – 480,
1926 елда – 289,
1938 елда – 172,
1949 елда – 157,
1958 елда – 142,
1970 елда – 79,
1979 елда – 52,
1989 елда – 13,
2002 елда – 13,
2010 елда – 4,
2015 елда – 4 кеше (руслар, татарлар).