Кызыл Уракчы

Авылга 1920 елларда нигез салына.

1917 елларга кадәр авыл җирләрендә кенәз И.М.Оболенский биләмәләре, шулай ук аның милкендә булган кирпеч һәм спирт заводлары, су тегермәне урнаша.

Нигез салынган көннән авыл ТАССРның Чистай кантоны Биләр волостена керә. 1930 елның 10 августыннан – Биләр, 1963 елның 1 февраленнән – Чистай, 1964 елның 4 мартыннан Алексеевск районнарында.

Хәзер Зирекле авыл җирлегенә керә.

1930 елларда авылда «Кызыл Сабан» һәм «Кызыл Уракчы» колхозлары оештырыла, 1949 елдан – «Заветы Ленина» колхозы, 1973 елдан «Зирекле» совхозы составында (1995–2005 елларда «Зирекле» күмәк предприятиесе).

Халкы күбесенчә «Красный Восток Агро» җаваплылыгы чикләнгән җәмгыятьтә эшли (кырчылык, сөт терлекчелеге).

Авылда фельдшер-акушерлык пункты бар, 2000 еллар башына кадәр башлангыч мәктәп эшли. 2008 елда «Наил» мәчете ачыла.

Авылдан 1 км көньяктарак буралы курган культурасы һәм Идел буе Болгар дәүләте чоры археология истәлеге – Кызыл Уракчы авыллыгы урнашкан.

1926 елда – 36,
1938 елда – 293,
1949 елда – 189,
1958 елда – 147,
1970 елда – 153,
1979 елда – 133,
1989 елда – 129,
2002 елда – 126,
2010 елда – 117,
2015 елда – 109 кеше (татарлар).