Түбән Үрьяды

Авыл 1706 елдан мәгълүм. XVIII йөз – XIX йөзнең беренче яртысында халкы асаба башкортлар һәм типтәрләр катлауларына керә. Бу чорда халкының төп шөгыле – игенчелек, терлекчелек, умартачылык, вак һөнәрчелек.

1773 – 1775 еллардагы Крәстияннәр кузгалышында халкы Е.И.Пугачёв ягында сугыша.

XX йөз башында авылда мәчет эшли.

Авыл җәмәгатенең имана җире 460,7 дисәтинә тәшкил итә.

1920 елга кадәр Уфа губернасының Минзәлә өязе Семиостров волостена керә. 1920 елдан ТАССРның Минзәлә кантонында.

1930 елның 10 августыннан – Актаныш, 1935 елның 10 февраленнән – Калинин, 1959 елның 12 октябреннән – Актаныш, 1963 елның 1 февраленнән – Минзәлә, 1965 елның 12 гыйнварынан Актаныш районында.

Хәзер Күҗәкә авыл җирлеге составына керә.

1931 елда авылда “Лена” колхозы оештырыла.

Халкы күбесенчә крәстиян-фермер хуҗалыгында эшли.

1974 елга кадәр башлангыч мәктәп була.

1870 елда – 153,
1913 елда – 226,
1926 елда – 358,
1938 елда – 224,
1949 елда – 198,
1958 елда – 110,
1970 елда – 203,
1979 елда – 129,
1989 елда – 50,
2002 елда – 27,
2010 елда – 21,
2015 елда – 14 кеше (татарлар).