Ирмәш

Авылга XVIII йөзнең беренче яртысында нигез салына.

1860 елларга кадәр халкы асаба башкортлар катлавына керә. Бу чорда халкының төп шөгыле – игенчелек һәм терлекчелек, һөнәрчелек, Әҗәкүл пристаненда көнлекле эш.

XIX йөзнең ахырында авыл җәмәгатенең имана җире 555 дисәтинә тәшкил итә.

1913 елга кадәр Шәрип, 1913 елдан Уфа губернасының Минзәлә өязе Такталачык волостена керә. 1920 елдан ТАССРның Минзәлә кантонында.

1930 елның 10 августыннан – Актаныш, 1963 елның 1 февраленнән – Минзәлә, 1965 елның 12 гыйнварыннан Актаныш районында.

Хәзер Актанышбаш авыл җирлеге составына керә.

1929 – 1930 елларда авылда “Үрләч” колхозы оештырыла, 1950 елда “Урал” колхозы составында (Әҗәкүл авылы). 1958 елдан “Урал” колхозы составына “Үзәк” колхозы (Актаныш авылы) керә. 1995 – 2003 елларда кооперативлар берләшмәсе, 2003 – 2006 елларда авыл хуҗалыгы җитештерү кооперативы.

1970 еллар башына кадәр башлангыч мәктәп эшли.

Авылның көньяк-көнбатыш читендә Ананьино һәм Пьянобор культурасына караган Ирмәш авыллыгы табыла.

Г.М.Фарухшин (1956 елда туган) – җырчы;

М.М.Фарухшин (1954 елда туган) – ТРның атказанган мәдәният хезмәткәре;

И.А.Хәбибуллин (1967 елда туган) – ТРның атказанган мәдәният хезмәткәре.

1795 елда – 62,
1834 елда – 128,
1859 елда – 176,
1870 елда – 192,
1897 елда – 177,
1908 елда – 187,
1920 елда – 233,
1926 елда – 222,
1938 елда – 341,
1949 елда – 206,
1958 елда – 233,
1970 елда – 236,
1979 елда – 182,
1989 елда – 126,
2002 елда – 113,
2010 елда – 147,
2015 елда – 140 кеше (татарлар).