Яңа Мурзиха

XVIII йөздә нигез салына.

1861 елгы реформага кадәр халкы алпавыт крәстияннәре катлавына керә. 1765 елга кадәр авыл алпавыт П.С.Буткевич бабалары биләмәсендә була, 1803 елда – коллежский асессор хатыны Н.Н.Шарыгинага, 1836 елда титуляр советник Ф.К.Пекенга сатыла.

Бу чорда халкының төп шөгыле – игенчелек, терлекчелек.

1897 елгы мәгълүматлар буенча, авылда бер класслы земство училищесе эшли (үз бинасында урнаша): 1920 елда 41 ир бала һәм 18 кыз бала укый.

XX йөз башында авыл җәмәгатенең имана җире 356 дисәтинә тәшкил итә.

1921 елга кадәр Вятка губернасының Алабуга өязе Казиле волостенда, 1921 елдан ТАССРның – Алабуга, 1928 елдан Чаллы кантонында.

1930 елның 10 августыннан – Алабуга, 1944 елның 19 февраленнән – Костенеево, 1944 елның 8 июненнән – Морт, 1954 елның 19 ноябреннән Алабуга районында.

Хәзер Мурзиха авыл җирлеге үзәге.

Күмәкләштерү елларында авылда “Мурзиха” колхозы (беренче рәисе – Ф.П.Калашников) оештырыла. 1958 елда Гассар исемендәге колхоз (Токмаш авылы) составына керә.

Колхозның төп эшчәнлек тармагы – сортлы орлыкчылык. 1970 елда ТАССРның Министрлар Советы һәм Югары Советы Президиумы Байрагы белән бүләкләнә. 1995–2004 елларда Гассар исемендәге җитештерү авыл хуҗалыгы кооперативы.

Халкы күбесенчә кырчылык, ит-сөт терлекчелеге белән шөгыльләнә.

Авылда мәдәният йорты (1962 елда яңа бина төзелә), китапханә бар (1941 елда – уку өе, 1953 елда китапханә ачыла).

1859 елда – 164,
1887 елда – 333,
1905 елда – 688,
1920 елда – 727,
1926 елда – 863,
1938 елда – 703,
1949 елда – 454,
1958 елда – 371,
1970 елда – 352,
1979 елда – 397,
1989 елда – 371,
2002 елда – 289,
2010 елда – 261,
2017 елда – 214 кеше (руслар – 75%, татарлар – 17%, әрмәннәр – 5,6%).