Түке

Авылга XVII йөзнең ахырында нигез салына.

1860 елларга кадәр халкы асаба башкортлар һәм типтәрләр катлауларына керә. Бу чорда халкының төп шөгыле – игенчелек, терлекчелек һәм умартачылык.

1773–1775 елгы Крәстияннәр кузгалышында халкы Е.И.Пугачёв ягында сугыша (А.Ягъфәров отряды составында авылдан 13 кеше була).

XX йөз башында авылда мәчет, мәктәп, икмәк саклау-сату кибете була.

Авыл җәмәгатенең имана җире 1404 дисәтинә тәшкил итә.

1920 елга кадәр Уфа губернасының Минзәлә өязе Пучы волостена керә. 1920 елдан ТАССРның Минзәлә кантонында.

1930 елның 10 августыннан – Минзәлә, 1935 елның 10 февраленнән – Калинин, 1959 елның 12 октябреннән – Актаныш, 1963 елның 1 февраленнән – Минзәлә, 1965 елның 12 гыйнварыннан Актаныш районында.

Хәзер Түке авыл җирлеге үзәге.

Күмәкләштерү елларында авылда “Партизан” колхозы оештырыла. 1959 елда “Татарстан” колхозы (Зөбәер авылы) составына керә. 1994 – 2004 елларда “Татарстан” авыл хуҗалыгы җитештерү кооперативы.

Халкы күбесенчә “Агрофирма “Әнәк” җаваплылыгы чикләнгән җәмгыятьтә эшли, кырчылык, ит-сөт терлекчелеге белән шөгыльләнә.

2006 елга кадәр авылда башлангыч мәктәп эшли.

Клуб (бина 2013 елда төзелә), китапханә, мәчет бар (1998 елдан, Р.Р.Хуҗина акчасына төзелә).

А.И.Галиев (1961 елда туган) – ТРның атказанган мәдәният хезмәткәре;

И.М.Галиев (1951 елда туган) – ТАССРның атказанган агрономы;

Р.Р.Солтанова (1958 елда туган) – сәнгать белеме докторы, ТРның атказанган сәнгать эшлеклесе;

Ф.Р.Солтанова-Жданова (1961 елда туган) – спортчы (җиңел атлетика), ТРның һәм РФнең атказанган спорт мастеры, марафон йөгереше буенча Россия чемпионы;

Т.Ф.Фазлуллин (1930 – 2008) – ТРның һәм РФнең атказанган агрономы, Хезмәт Кызыл Байрагы ордены кавалеры.

1795 елда – 182,
1816 елда – 187 ир заты;
1859 елда – 352,
1870 елда – 470,
1884 елда – 609,
1897 елда – 576,
1906 елда – 703,
1913 елда – 762,
1920 елда – 737,
1926 елда – 555,
1938 елда – 646,
1949 елда – 480,
1958 елда – 461,
1970 елда – 655,
1979 елда – 573,
1989 елда – 428,
2002 елда – 366,
2010 елда – 421,
2015 елда – 388 кеше (татарлар).