Иске Солтангол

Авылга XVII йөздә нигез салына.

1860 елларда халкы асаба башкортлар катлавына керә. Бу чорда халкының төп шөгыле – игенчелек һәм терлекчелек.

XX йөз башында авылда 2 мәчет, мәктәп (1865 елда ачыла), почта станциясе бар.

Авыл җәмәгатенең имана җире 1962 дисәтинә тәшкил итә.

1920 елга кадәр Уфа губернасының Минзәлә өязе Байсар волостена керә. 1920 елдан ТАССРның Минзәлә кантонында. 1930 елның 10 августыннан – Актаныш, 1963 елның 1 февраленнән – Минзәлә, 1965 елның 12 гыйнварыннан – Актаныш районында.

Хәзер Иске Богады авыл җирлеге составына керә.

1929 елда авылда “Иске Солтангол” колхозы оештырыла (беренче рәисе – М.Ишморатов). 1934 елда Киров исемендәге колхоз итеп үзгәртелә. 1960 елда “Коммунизмга” колхозы, 1994 елдан “Богады” кооперативлары берләшмәсе.

1958 елда электр станциясе төзелә.

Халкы күбесенчә “Тамыр” җаваплылыгы чикләнгән җәмгыятьтә эшли, кырчылык, ит-сөт терлекчелеге белән шөгыльләнә.

1922 елда башлангыч мәктәп ачыла, 1950 елда җидееллык (бина 1956 елда төзелә), 1957 елда – башлангыч мәктәп итеп үзгәртелә (2008 елда ябыла).

Авылда клуб (1981 – 1983 елларда элеккеге мәчет бинасында урнаша), фельдшер-акушерлык пункты бар.

1795 елда – 164,
1834 елда – 364,
1859 елда – 550,
1870 елда – 588,
1884 елда – 741,
1897 елда – 751,
1906 елда – 955,
1913 елда – 1060,
1920 елда – 939,
1926 елда – 776,
1938 елда – 568,
1949 елда – 398,
1958 елда – 336,
1970 елда – 392,
1979 елда – 334,
1989 елда – 201,
2002 елда – 201,
2010 елда – 149,
2015 елда – 163 кеше (татарлар).