Иске Әгъбәз

Авыл 1731 елдан мәгълүм.

XVIII – XIX йөзләрдә халкы асаба башкортлар катлавына керә.

XX йөз башында авылда мәчет (1809 елдан билгеле), мәктәп бар (1862 ел).

Авыл җәмәгатенең имана җире 3368 дисәтинә тәшкил итә.

1920 елга кадәр  Уфа губернасының Минзәлә өязе Әмәкәй волостена керә. 1920 елдан ТАССРның Минзәлә кантонында. 1930 елның 10 августыннан – Актаныш, 1935 елның 10 февраленнән – Калинин, 1959 елның 12 октябреннән – Актаныш, 1963 елның 1 февраленнән – Минзәлә, 1965 елның 12 гыйнварыннан Актаныш районында.

Хәзер Чуракай авыл җирлеге составында.

1929 елда авылда “Удар” колхозы оештырыла (беренче рәисе – Ф.Гайсин). Колхоз таркалганнан соң “Удар-2” исеме белән яңадан торгызыла. 1957 елда “Авангард” колхозына “Җиңү” колхозы (Чуракай авылы) белән берләшә, “Алга” җаваплылыгы чикләнгән җәмгыять составында.

Халкы күбесенчә крәстиян-фермер хуҗалыгында эшли, кырчылык, сөт терлекчелеге белән шөгыльләнә.

Авылда башлангыч мәктәп (бина 1969 елда төзелә), балалар бакчасы (1966 елдан), клуб (бина 1976 елда төзелә), китапханә, фельдшер-акушерлык пункты, “Галия” мәчете бар (2001 елдан).

В.Х.Вахитов (1952 елда туган) – хакимият-хуҗалык хезмәткәре, Менделеевск районы хакимият башлыгы (1991 – 1999 еллар);

Т.М.Насыйров (1925–2015) – тарих фәннәре кандидаты, татар вакытлы матбугаты (шул исәптән эмиграция матбугаты), Татарстан матбугатын һәм ТАССРда китап нәшер итүнең 1941 – 1945 еллардагы тарихы буенча хезмәтләр авторы.

1795 елда – 107,
1834 елда – 171,
1859 елда – 381,
1870 елда – 456,
1884 елда – 691,
1897 елда – 907,
1906 елда – 969,
1913 елда – 1132,
1920 елда – 1034,
1926 елда – 953,
1938 елда – 993,
1949 елда – 754,
1958 елда – 556,
1970 елда – 627,
1979 елда – 506,
1989 елда – 349,
2002 елда – 286,
2010 елда – 304,
2015 елда – 280 кеше (татарлар).