Апач

Авылга 1731 елда мулла Апас Түнтиев (Карабәк нәселеннән) тарафыннан нигез салына, шунлыктан Апас атамасы белән дә билгеле.

XVIII – XIX йөзләрдә халкы асаба башкортлар һәм дәүләт крәстияннәре катлауларына керә. 1760 еллардагы мәгълүматларга караганда халкының бер өлешен марилар тәшкил итә.

1773 – 1775 елгы Крәстияннәр кузгалышында халкы Е.И.Пугачёв ягында актив көрәшә. Бу чорда халкының төп шөгыле – игенчелек, терлекчелек һәм умартачылык була.

Мәчет 1808 елдан мәгълүм (имамы – Г.Мансуров), 1837 елдан аның каршында ир балалар мәктәбе эшли.

1870 елгы мәгълүматлар буенча авылда 3 су тегермәне, 1906 елда ипи саклау-сату һәм бакалея кибетләре эшли.

XIX йөз ахырында авыл җәмәгатенең имана җире 1151 дисәтинә тәшкил итә.

1920 елга кадәр Уфа губернасының Минзәлә өязе Байсар волостена керә. 1920 елдан ТАССРның Минзәлә кантонында.

1930 елның 10 августыннан – Актаныш, 1935 елның 10 февраленнән – Калинин, 1959 елның 12 октябреннән – Актаныш, 1963 елның 1 февраленнән – Минзәлә, 1965 елның 12 гыйнварыннан Актаныш районында.

Хәзер Әтәс авыл җирлеге составына керә.

1931 елда авылда “Воровский” колхозы оештырыла. 1951 елда “Алга” колхозы (Чирү авылы) составында, 1956 елда – “Игенче” колхозы (Әтәс авылы) составына керә. 1994 елдан  “Игенче” кооперативы берләшмәсе. 2003 – 2008 елларда “Игенче” авыл хуҗалыгы җитештерү коопреративы.

Халкы күбесенчә “Агрофирма “Әнәк” җаваплылыгы чикләнгән җәмгыятьтә эшли, кырчылык, терлекчелек белән шөгыльләнә.

2005 елда Апач һәм Әтәс авыллары арасында “Әтәс-Апач” мәчете төзелә.

Ф.Х.Закиров (1938 елда туган) – хакимият-хуҗалык эшлеклесе, төбәкне өйрәнүче, “Апачмы, әллә Апасмы?” (“Апачево или Апасово?”) төбәк китабының авторы;

А.Ш.Шәйгәрданов (1930 – 2014 еллар) – ТРның атказанган агрономы,  Хезмәт Кызыл Байрак ордены кавалеры.

1795 елда – 88,
1816 елда – 107,
1859 елда – 337,
1870 елда – 319,
1884 елда – 481,
1896 елда – 462,
1906 елда – 525,
1913 елда – 579,
1926 елда – 403,
1938 елда – 375,
1949 елда – 164,
1958 елда – 291,
1970 елда – 362,
1979 елда – 324,
1989 елда – 242,
2002 елда – 203,
2010 елда – 183,
2015 елда – 189 кеше (татарлар).