Аршинов Виктор Петрович

1945 елның 22 октябрендә Бакуда туган.

Мәскәү өлкә сәнгать училищесен тәмамлаганнан соң (1970), Казанда эшли. Сәүдә рекламасының Казан комбинатында (1970–1974), Сәнгать фондында (1974–1976) эшли.

1976 елдан башлап озак вакыт Татарстан Рәссамнар берлеге президиумы әгъзасы, берлекнең җаваплы секретаре, графика секциясе җитәкчесе булып тора.

2013 елдан Россия Рәссамнар берлегенең Татарстан бүлеге җитәкчесе.

В.П.Аршиновның иҗат эшчәнлеге китап һәм журнал графикасы, станлы графика, плакат, рәсем сәнгате, скульптура, театр декорациясе һәм монументаль бизәлеш сәнгате өлкәләрен колачлый.

Төсле һәм график портретларда, М.Җәлил («Моабит дәфтәрләре»ннән сериясе, 1973–1976), Данте («Яңа тормыш»ка иллюстрация, 1970–1971), П.Элюар («Элиот мотивлары», 1996–1998) һәм башка әсәрләренә ясалган иллюстрацияләрдә һәм композицияләрдә иҗат теленең катлаулылыгы, символик-аллегорик образларга мөрәҗәгать итүе күзәтелә.

В.П.Аршинов графикасында Г.Тукай шигърияте темалары аерым урын алып тора. («Су анасы», 1975; «Шүрәле», 1975; «Тукай шигырьләре мотивлары» сериясе, 1976).

В.П.Аршиновның нәкышь әсәрләренә шартлы бизәклелек, төсләр бирелешенең байлыгы һәм силуэтның рәсем үзенчәлеге хас («Реквием, 1924», 1973; «Нина Локтионова», 1979; «Зур натюрморт», 1979; «Югославия буйлап» сериясе, 1981).

Бөтенсоюз («Кино һәм театр рәссамнәре», Мәскәү, 1978–1979), бөтенроссия («Совет Россиясе», Мәскәү, 1975; 1980) күргәзмәләрендә, төбәкара («Зур Идел», 1974 елдан) күргәзмәләрдә катнаша.

Шәхси күргәзмәләре Казанда һәм Татарстанның башка шәһәрләрендә (1977, 1978, 1979, 1981, 1985, 1996, 2000), Мәскәүдә (1980) һәм Йошкар-Олада (1982) күрсәтелә.

Әсәрләре ТР Дәүләт сынлы сәнгать музеенда, Удмурт һәм Каракалпак республикалары музейларында, ТР Милли музеенда, Кораллы көчләр музеенда (Мәскәү), Баку, Әстерхан һәм башка шәһәрләрнең картиналар галереяларында саклана.

В.П.Аршинов – Татарстанның Г.Тукай исемендәге дәүләт бүләге лауреаты (2008).

Червонная С.М. Искусство Советской Татарии. М., 1978.

Червонная С.М. Художники Советской Татарии. Казань, 1984.

Автор – М.Е.Ильина