Бәерле

XVIII йөздә нигезләнә. Беренче исеме – Бөреле.

1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук сүс тетү, тукучылык (киндер сугу) тарала.

ХХ йөз башында 2 тимерчелек, 3 җил һәм 1 ярма яргыч эшли. Авыл җәмәгатенең имана җире 727,4 дисәтинә тәшкил итә.

1912 елда авылда Е.А.Боратынскийның хатыны А.Л.Боратынская ярдәме белән А.Н.Раеваның шәхси мәктәбе ачыла.

1920 елга кадәр авыл Казан губернасының Казан өязе Алат волостена керә. 1920 елдан – ТАССРның Арча кантонында. 1930 елның 10 августыннан – Дөбъяз, 1963 елның 1 февраленнән – Яшел Үзән, 1965 елның 12 гыйнварыннан – Биектау районында.

Хәзер Каенлык авыл җирлегендә.

2000 елдан авылда “Красная Заря” авыл хуҗалыгы җитештерү кооперативы эшли. Халкы кырчылык һәм терлекчелек белән шөгыльләнә.

Авылда фельдшер-акушерлык пункты эшли.

Авыл янында археология истәлеге – Алтын Урда чоры болгар әйберләре табыла.

Г.Ф.Яшин (1907 – 1957) – Бөек Ватан сугышы ветераны, Советлар Союзы Герое; авылның бер урамына аның исеме бирелә.

1782 елда – 165 ир-ат;
1859 елда – 237,
1897 елда – 294,
1920 елда – 396,
1926 елда – 350,
1938 елда – 420,
1949 елда – 225,
1958 елда – 200,
1970 елда – 114,
1989 елда – 79,
2002 елда – 87,
2010 елда – 79,
2017 елда – 86 кеше (руслар – 99%, башкортлар – 1%).