Куян

Авыл 1680 елдан Пустошь по Маткауш речке исеме белән билгеле.

XVIII йөз –XIX йөзнең беренче яртысында халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек, шулай ук умартачылык, көнлекчелек тарала.

XX йөз башында авылда мәчет (1911 елдан) һәм мәктәп эшли. Авыл җәмәгатенең имана җире 292 дисәтинә тәшкил итә.

1920 елга кадәр Уфа губернасының Минзәлә өязе Иске Мәлкән волостена керә. 1920 елдан ТАССРның Минзәлә кантонында. 1930 елның 10 августыннан – Минзәлә, 1944 елның 19 февраленнән – Матвеевка, 1954 елның 19 ноябреннән Минзәлә районында.

Хәзер Бикбау авыл җирлеге составында.

1929 елда авылда “Кызыл көрәшче” колхозы оештырыла, 1930 елда “Дружный” авыл хуҗалыгы артеле, 1950 елда – “Просвет второй пятилетки” колхозы, 1956 елдан – “Победа” колхозы, 1961 елдан “Гигант” колхозы, 1999 елдан – “Өмет” авыл хуҗалыгы җитештерү кооперативы, 2006 елдан “Минзәлә таңнары” агрофирмасы” җаваплылыгы чикләнгән җәмгыяте составында.

Халкы кырчылык, ит-сөт терлекчелеге белән шөгыльләнә.

2006 елга кадәр башлангыч мәктәп эшли.

Авылда клуб, китапханә, фельдшер-акушерлык пункты (барысы да 1965 елгы бинада) бар.

1795 елда – 67,
1859 елда – 121,
1870 елда – 576,
1884 елда – 177,
1906 елда – 261,
1913 елда – 312,
1920 елда – 341,
1926 елда – 321,
1938 елда – 200,
1958 елда – 385,
1970 елда – 345,
1979 елда – 252,
1989 елда – 125,
2002 елда – 67,
2010 елда – 54,
2017 елда – 32 кеше (татарлар).