Аргы Ивановка

Авылга 1830−1840 елларда Баграж-Никольский авылы хуҗасы И.Г.Рюмин нигез сала. Беренче исеме – Ивановка.

1860 елларга кадәр халкы алпавыт крәстияннәре катлавына керә (И.Г.Рюминның варислары карамагында). Бу чорда халкының төп шөгыле – игенчелек һәм терлекчелек, чыпта-кап сугу кәсепчелеге, умартачылык, олаучылык таралган була.

XX йөз башында земство училищесе (1903 елда, 1905 елда 31 ир бала һәм 4 кыз бала укый), 2 бакалея, икмәк саклау һәм сату кибете эшли. Авыл Баграж-Никольский авылы приходына карый.

Бу чорда авыл җәмәгатенең имана җире 732,4 дисәтинә тәшкил итә.

1920 елга кадәр Уфа губернасының Минзәлә өязе Троицк-Йосып волостена керә. 1920 елдан – ТАССРның Минзәлә, 1922 елдан Чаллы кантонында; 1930 елның 10 августыннан − Яңа Чишмә, 1963 елның 1 февраленнән Әлмәт районында.

Хәзер Баграж-Никольский авыл җирлеге үзәге.

1930 еллар башында авылда Баграж-Никольский авылы белән бергә Будённый исемендәге колхоз оештырыла. 1957 елда зурайтылган “Заря” колхозы составына (үзәк – Аргы Ивановка авылында) керә, хәзер “Заря” җаваплылыгы чикләнгән җәмгыять.

Халкы кырчылык, ит-сөт терлекчелеге белән шөгыльләнә.

1985 елда авылда тулы булмаган урта мәктәп ачыла (яңа бина төзелә), 2007 елда башлангыч мәктәпкә үзгәртелә.

Авылда мәдәният йорты, китапханә бар.

1859 елда – 299,
1897елда – 669,
1920елда – 823,
1926елда – 717,
1938елда – 442,
1949елда – 397,
1958елда – 372,
1970елда – 457,
1979елда – 336,
1989елда – 320,
2002елда – 317,
2010елда – 248,
2015елда – 292 кеше (руслар).