Татар Таңсары

XVI йөзнең икенче яртысында нигез салына. Революциягә кадәрге чыганакларда Даташуран исеме белән телгә алына.

XVIII йөз – XIX йөзнең беренче яртысында халкы дәүләт крәстияннәре катлавына керә. Бу чорда халкының төп шөгыле – игенчелек, терлекчелек, шулай ук чыпта-кап сугу кәсепчелеге тарала.

XX йөз башында авылда мәчет, мәктәп, тегермән эшли.

Бу чорда авыл җәмәгатенең имана җире 370 дисәтинә тәшкил итә.

1919 елга кадәр авыл – Вятка, 1919 елдан – Казан, 1920 елдан – Вятка губернасының Алабуга өязе Сарсак-Умга волостенда. 1921 елның гыйнварыннан – ТАССРның Алабуга (июньгә кадәр өяз), декабреннән – Әгерҗе, 1924 елдан Алабуга кантонында.

1927 елның 14 февраленнән – Әгерҗе, 1963 елның 1 февраленнән – Алабуга, 1964 елның 4 мартыннан Әгерҗе районында.

Хәзер Сарсак-Умга авыл җирлеге составына керә.

Хәзерге вакытта авылда “Сарсак-Умга” җаваплылыгы чикләнгән җәмгыять эшли. Фельдшер-акушерлык пункты бар.

Халкы кырчылык, терлекчелек белән шөгыльләнә.

Авылда РФ Генераль прокуроры урынбасары, Дәүләт Думасы депутаты, РФнең атказанган юристы Э.А.Вәлиевнең (1950 елда туган) балачагы уза.

1763 елда – 28 ир-ат;
1859 елда – 120,
1887 елда – 127,
1905 елда – 176,
1920 елда – 246,
1926 елда – 257,
1938 елда – 295,
1958 елда – 173,
1970 елда – 152,
1989 елда – 92,
2002 елда – 48,
2010 елда – 39,
2015 елда – 38 кеше (татарлар).