Удмурт Ташлысы

Авылга XIX йөздә (чама белән 1820 елда Покрово-Урустамак авылы аучылары тарафыннан) нигез салына. Революциягә кадәрле чыганакларда Заитово Узла исеме белән билгеле.

1860 елларда халкы дәүләт крәстияннәре катлавына керә. Бу чорда авыл халкының төп шөгыле – игенчелек һәм терлекчелек.

XX йөз башында авылда чиркәү-приход мәктәбе, су тегермәне эшли.

Авыл җәмәгатенең имана җире 954 дисәтинә тәшкил итә.

1920 елга кадәр Самара губернасының Бөгелмә өязе Иваново волостена керә. 1920 елдан ТАССРның Бөгелмә кантонында.

1930 елның 10 августыннан – Баулы, 1963 елның 1 февраленнән – Бөгелмә, 1965 елның 12 гыйнварыннан – Баулы районында.

Хәзер Удмурт Ташлысы авыл җирлеге составында.

1930 елда авылда “Новая деревня” колхозы оештырыла. 1977 елда авыл “Дружба”колхозы составына керә, 1982 елда – “Югдон” колхозы. 2000 елдан “Югдон” авыл хуҗалыгы җитештерү кооперативы.

Халкы күбесенчә кырчылык, сөт терлекчелеге, дуңгыз асрау белән шөгыльләнә.

Авылда мәдәният йорты (1961 елдан), китапханә, фельдшер-акушерлык пункты, балалар бакчасы бар (1987 елдан).

Мәдәният йорты каршында “Мертчан” фольклор ансамбле эшли (1985 елдан, оештыручысы – С.З.Смагулова).

Авылда төзекләндерелгән “Аз весь ву” чишмәсе бар.

В.В.Романов (1943 – 1989) – удмурт шагыйре.

1859 елда – 239,
1889 елда – 323,
1897 елда – 433,
1910 елда – 505,
1920 елда – 449,
1926 елда – 525,
1949 елда – 439,
1958 елда – 520,
1970 елда – 396,
1979 елда – 315,
1989 елда – 324,
2002 елда – 333,
2010 елда – 333,
2015 елда – 322 кеше (удмуртлар).