Яңа Тимошкино

Авылга XVIII йөз уртасына кадәр нигез салына. Революциягә кадәрге чыганакларда Бердебяково исеме белән дә билгеле.

1860 елларга кадәр халкы дәүләт крәстияннәре катлавына керә. Бу чорда халкының төп шөгыле – игенчелек һәм терлекчелек.

1907 елда авылда земство башлангыч мәктәбе ачыла. XX йөз башында вак-төякләр кибете эшли.

Авыл җәмәгатенең имана җире 859 дисәтинә тәшкил итә.

1920 елга кадәр авыл Казан губернасының Чистай өязе Котыш волостена керә. 1920 елдан ТАССРның Чистай кантоны составында.

1930 елның 10 августыннан – Аксубай, 1963 елның 1 феврвленнән – Октябрь, 1965 елның 12 гыйнварыннан Аксубай районында.

Хәзер Иске Тимошкино авыл җирлеге составына керә.

1928 елда “Начало” колхозы оештырыла, соңыннан Ф.Энгельс исемендәге колхозга үзгәртелә. 1994−2006 елларда Ф.Энгельс исемендәге күмәк предприятие. 2006−2011 елларда “Тимошкино” җаваплылыгы чикләнгән җәмгыять.

Халкы күбесенчә “Сөт иле − Аксу” җаваплылыгы чикләнгән җәмгыятьтә эшли, кырчылык, ит-сөт терлекчелеге белән шөгыльләнә.

1920 елларда башлангыч мәктәп ачыла, 1938 елда – җидееллыкка, 1940 елларда тулы булмаган урта мәктәпкә үзгәртелә.

Авылда мәктәп – балалар бакчасы (2015 елдан), китапханә, мәдәният йорты, фельдшер –акушерлык пункты эшли.

Авыл янында гомуми Болгар чорына караган 6 археология истәлеге табыла (авыллыклар).

Г.С.Мадюков (1942 елда туган) – прозаик.

1782 елда – 37 ир заты;
1859 елда – 278,
1897 елда – 432,
1908 елда – 501,
1920 елда – 546,
1926 елда − 629,
1938 елда – 670,
1949 елда – 471,
1958 елда – 488,
1970 елда – 781,
1979 елда – 666,
1989 елда – 499,
2002 елда – 558,
2010 елда – 476,
2015 елда – 467 кеше (чуашлар).