Яңа Кармәт

Авыл 1748 елдан мәгълүм.

1860 елларга кадәр халкы дәүләт крәстияннәре катлавына керә. Бу чорда халкының төп шөгыле – игенчелек, терлекчелек, мичкә ясау кәсебе киң таралган була.

1870 ел мәгълүматлары буенча авылда 2 мәчет һәм 2 мәдрәсә эшли. 1896 елда бер класслы рус-татар чиркәү-приход мәктәбе ачыла.

XX йөз башында авылда мәчет, 7 вак-төякләр кибете эшли.

Бу чорда авыл җәмәгатенең имана җире 1644 дисәтинә тәшкил итә.

1920 елга кадәр авыл Казан губернасының Чистай өязе Иске Мукшы волостена керә. 1920 елдан ТАССРның Чистай кантоны составында.

1930 елның 10 августыннан – Аксубай, 1963 елның 1 февраленнән – Октябрь, 1965 елның 12 гыйнварыннан Аксубай районында.

Хәзер Яңа Кармәт авыл җирлеге үзәге.

1930 елда авылда “Алга” колхозы оештырыла, 1991 елда – “Яңа Кармәт” совхозы, 1994 елда “Дума” совхозы составына керә. 1995−2006 елларда “Яңа Кармәт” күмәк предприятиесе. 2004−2014 елларда “Кармәт” җаваплылыгы чикләнгән җәмгыять.

Халкы күбесенчә “Татагро” авыл хуҗалыгы предприятиесендә эшли, кырчылык, сөт терлекчелеге белән шөгыльләнә.

1917 елда башлангыч мәктәп ачыла, 1948 елда – җидееллыкка, 1969 елда – урта булмаган тулы мәктәпкә, 2002 елда башлангыч мәктәпкә үзгәртелә.

Авылда мәдәният йорты, фельдшер-акушерлык пункты, китапханә, мәчет (2000 елдан) бар.

Авылдан төньяктарак Имәнкискә культурасы истәлекләре – Яңа Кармәт авыллыклары (I һәм II) табыла.

Ә.Г.Хәйруллин (1958 елда туган) – философ, социолог, философия фәннәре докторы, РФнең мактаулы югары һөнәри белем бирү хезмәткәре.

1782 елда – 77 ир заты;
1859 елда – 883,
1897 елда – 1426,
1908 елда – 1713,
1920 елда – 1184,
1926 елда – 750,
1938 елда − 792,
1949 елда − 706,
1958 елда – 687,
1970 елда − 933,
1979 елда – 796,
1989 елда – 412,
2002 елда – 373,
2010 елда − 350,
2015 елда – 290 кеше (татарлар).