Татарская беднота

РКП(б)ның Татарстан өлкә комитеты һәм Республиканың Запас армиясе сәяси идарәсе органы.

1919 елның 29 сентябреннән 1921 елның 3 мартына кадәр Казанда рус телендә нәшер ителә, барысы 430 саны чыга.

1921 елның 27 гыйнварына кадәр «Красный боец» исеме белән чыга (Республиканың Запас армиясе Революцион Хәрби Советының сәяси бүлеге органы).

Армия штабы басмаханәсендә басыла.

Мөхәррирләре — Н.Федорович, В.Ворошилин.

Газета белән Н.Городецкий, П.Горский, С.Дәүләтгәрәев, А.Догадов, Н.Иванович, О.Измайлович, В.Именецкий, С.Красновидов, С.Корбут, А.Мясников, А.Певцов, А.Рыжков, Н.Фирсов һәм башкалар хезмәттәшлек итә.

Оборона Советы, Хезмәт һәм Оборона Советы карарлары, Запас армия Революцион Хәрби Советының боерыклары басыла.

Төп игътибар Запас армия эшчәнлеген яктыртуга бирелә, сугышка сәләтле Кызыл Армия частьларын әзерләү һәм фронтка җибәрү мөһим бурыч була.

«Татарская беднота»да махсус курслар, мәктәпләр, уку полклары эше, укуда алдынгы курсантлар, хәрби техника төрләре һәм аларны сугышта куллану, кул сугышы алымнары турындагы мәкаләләр урын ала.

Сугышчыларны патриотик рухта тәрбияләүгә, сугышта һәм хезмәттә каһарманлык күрсәтергә әзерлек мәсьәләләренә аерым урын бирелә; сугышта каһарманлык күрсәтү мисалларына багышланган күпсанлы хәбәрләр шул максатка хезмәт итә.

Армия сәяси бүлегенең интернациональ бүлекчәләре, бүлекнең татар, чуаш, мари, удмурт һәм мордва секцияләре эшчәнлеге тәфсилләп яктыртыла. Запас армия актив катнашкан Казан–Екатеринбург линиясендә тимер юл хәрәкәтен торгызу барышы турындагы материалларга зур урын бирелә.

Газетада армиянең тыныч халык арасындагы сәяси эше, Казанның милли-агарту учреждениеләре эшчәнлеге, наданлыкны бетерү, Запас армиянең 1920 елгы Сәнәкчеләр фетнәсен бастыруда катнашу тарихы, ТАССР һәм башка Урта Идел буе автономияләренең оешу һәм үсешенең иң мөһим мизгелләре чагылыш таба.

1920–1921 еллар ахырында газета төп игътибарын демобилизацияләнгән кызылармиячеләрнең алдагы язмышына юнәлтә, аларны актив рәвештә тыныч иҗади эшкә кушылып китәргә чакыра.

1920 елда – «Татарская беднота»ның «Пулемёт. Листок юмора и сатиры», «Бюллетень «Красного бойца», 1921 елда «Бюллетень еженедельной газеты «Татарская беднота», «Красная молодёжь» кушымталары чыгарыла.

Кәгазь һәм акча җитмәү сәбәпле, газета чыгудан туктый.

Зиновьев В.Ф. Опыт Коммунистической партии по интернациональному и политическому воспитанию воинов в период Гражданской войны. 1918–1920 гг. (По материалам Запасной армии Республики): дисәтинә ... Казань, 1974.

Татар энциклопедиясе. Казан, 2016. Т.5;

 Пресса Казани ХIХ–ХХI вв. Казань, 2016;

Татарская периодическая печать: Научно-энциклопедическое издание. Казань, 2017;

Казанская периодика ХIХ–ХХI вв.: Энциклопедический справочник для средств массовых коммуникаций. Казань, 2018;

Автор – Т.М.Насыйров