Пролетарий Татарстана

1925 елның февраленнән 1926 елның маена кадәр Казанда рус телендә нәшер ителә, барысы 16 саны чыга.

Мөхәррире — Татпрофсовет сәркәтибе Н.Рагс.

Журналның максаты — ТАССР профсоюзлары эшчәнлеген, сәнәгатьтәге, сәүдә һәм кооперациядәге вазгыятьне, шулай ук профсоюз әгъзаларының көндәлек тормышын һәм эшләрен яктырту.

«Пролетарий Татарстана» партия һәм профсоюзларның җитәкче органнары материалларын, шул исәптән РКП(б) ҮКның «Профсоюзлар эше турында», ВЦСПСның «Татреспубликада профессор эшләрнең халәте турында», Татпрофсоветның «Пролетарий Татарстана» журналы эшчәнлеге турында» пленум резолюцияләрен бастыра.

ТАССР профессор оешмалары съездлары һәм кабаттан сайлаулар турындагы язмаларга зур урын бирелә.

«Фабрика һәм заводлар буйлап», «Хезмәтне саклау», «Эшчеләр көнкүреше» бүлекләрендә республиканың «Кызыл шәрекъ», «Спартак», «Хезмәт җиңүе», М.Вахитов исем., «Кызыл тукучы» һәм башка предприятиеләрендәге хәлләр турында тәфсилле мәкаләләр басыла.

Редакция шулай ук икътисад үсеше юнәлешләре турындагы аналитик һәм бәхәсле мәкаләләр дә бастыра («1924–1925 елларга Татарстан Республикасында трестлаштырылган сәнәгать һәм аның перспективалары», «Эшче көчләр белән тәэмин итү турында» һ.б.).

Авылдагы эшләргә: профсоюзларны ныгыту, алар эшчәнлегенең үзенчәлекле шартлары, эш башкаруда татар телен гамәлгә кертү, батраклар мәнфәгатен яклау мәсьәләләренә дә игътибар бирелә.

Күп кенә язмалар хезмәт биржасына һәм эшсезләр өчен җәмәгать эшләрен оештыруга, производство киңәшмәләре эшен җанландыруга, хезмәтне фәнни оештыруга, хатын-кызларның производствода тоткан урынына, мәдәният эшенең куелышына багышлана.

«Безнең союзларыбызның үткәненнән» рубрикасында Татпрофсоветның профсоюзлар хәрәкәтен өйрәнү комиссиясе материаллары, Алафузов һәм Крестовниковлар заводлары эшчеләренең баш күтәрүләре, Казан профсоюзларының яшерен үзәк бюросы, Металлчылар берлеге эшчәнлеге, Казан эшчеләренең беренче маёвкалары турындагы мәкаләләр басыла; профсоюз лидерлары А.И.Догадов, М.Е.Ендаков, К.А.Ратёхин һәм башка хакында очерклар бирелә.

1925 елгы 11 нче сан 1905–1907 еллардагы революциянең 20 еллыгына багышланып чыга.

Әдәби бүлектә фельетоннар, сатирик язмалар, хикәяләр дөнья күрә.

Абдрашитова И.М. «Пролетарий Татарстана» (1925–1926) // Из истории Татарии. Казань, 1973. Сб.5;

Татар энциклопедиясе. Казан, 2014. Т.4;

Айнутдинов Р.А., Айнутдинова Л.М., Гилазев З.З. Казанская научная пресса. Казань 2013;

Пресса Казани ХIХ–ХХI вв. Казань, 2016;

Татарская периодическая печать: Научно-энциклопедическое издание. Казань, 2017;

Казанская периодика ХIХ–ХХI вв.: Энциклопедический справочник для средств массовых коммуникаций. Казань, 2018.

Автор –Р.А.Айнетдинов