Листок объявлений

1875 елның 2 ноябреннән 1900 елның сентябренә кадәр Казанда атнасына 3 тапкыр рус телендә нәшер ителә.

Төрле елларда наширләре һәм мөхәррирләре — Л.Ленкевич, К.А.Тилли, П.К.Тилли.

Игъланнар бастыручы коммерциячел реклама газетасы буларак чыга башлый, Идел-Кама буендагы эре шәһәрләрнең, Казан губернасы шәһәрләренең дәүләт оешмаларына, кибетләргә, трактир биналарына, навигация чорында пароход җәмгыятьләре контораларына таратыла.

1894 елдан ай саен «сәүдә-сәнәгать һәм техника газетасы» буларак чыга башлый. Анда фән һәм техника өлкәсендәге (кирпеч җитештерү, электротехника, туку сәнәгате) яңа ачышлар турында кыска мәкаләләр, хәбәр-белдерүләр басыла.

Газета укучыларны атаклы Россия фабрикантлары һәм сәнәгатьчеләре белән таныштырып бара, сәнәгать фирмалары белешмәлекләрен бастыра, Россия эчендә шактый әйләнеше булган Мәскәү сәүдә-сәнәгать предприятиеләре турында мәгълүмат биреп тора.

Газета башкала газеталарында дөнья күргән мәкаләләрне дә кабаттан үзендә бастыра, сәүдә-сәнәгать статистикасын тәкъдим итә.

«Сораулар һәм җаваплар» рубрикасында укучылар сорауларына атаклы юристлар, сәнәгатьчеләр һәм фабрика хуҗалары җавап бирә.

Татар энциклопедиясе. Казан, 2012. Т.3;

Пресса Казани ХIХ–ХХI вв. Казань, 2016;

Казанская периодика ХIХ–ХХI вв.: Энциклопедический справочник для средств массовых коммуникаций. Казань, 2018.

Автор – Г.Р.Заманова