Идел-Урал өлкәсе

Мөселман халык комиссариаты органы.

«Безнең тавыш» газетасының дәвамчысы.

1918 елның 24 мартыннан 27 сенә кадәр Казанда татар телендә нәшер ителә, барлыгы 2 саны чыга.

Мөхәррире – А.Габидуллин.

И.Алмашев, И.Атнагулов, Н.Әхмәд углы, Ф.Басыйров, А.Биглов, Г.Габдерәшитов, С.Лафчетский, Ф.Мөхәммәдъяров, С.Палтаржитский, Г.Ракаев, А.-С.Таһиров, К.Терегулов, А.Якубовский һәм башка авторларның мәкаләләре басыла.

«Яшәсен мөселман демократиясе!» шигаре астында чыга.

Газетаның максаты: революция һәм мөселманнар демократиясе, Идел-Урал Штаты идеалларын яклау, РСФСРдагы барлык мөселманнарны бергә туплау.

Мөселманнарның 2 нче хәрби съезды, Казан губернасы крәстияннәре съезды, Мөселман халык комиссариаты материаллары басыла.

Төркестан, Казакъстан, Башкортстанда һәм башка урыннарда татар телендә газеталар чыгу турында белдерүләр бирелә.

Татар энциклопедиясе. Казан, 2010. Т.2;

Татарская периодическая печать: Научно-энциклопедическое издание. Казань, 2017.

Автор – А.Ә.Хәсәвнех