Александровка районы

Оренбург өлкәсенең төньяк-көнбатыш өлешендә урнашкан. 1935 елда оештырыла. Мәйданы – 3,1 мең кв.км. Үзәге – Александровка авылы (Оренбургтан 158 км ераклыкта урнашкан).

Халкы – 14750 кеше (2015 ел). Татарлар саны 2010 елда – 2596 кеше.

Башлыча, 1820–1840 елларда нигез салынган Тукай (2000 елда – 727 кеше), Султакай (523), Ягъфәр (621) авылларында яши.

1860 елларда Тукай һәм Султакай авылларында мәчетләр (1932–1935 елларда юкка чыгарыла) төзелә, алар каршында мәдрәсә һәм мәктәпләр эшли. 1920–1930 елларда районның 3 мәктәбендә укыту татар телендә алып барыла.

1993 елдан Султакай авылы мәдәният йорты каршында – халык драма коллективы, Ягъфәр авылында татар халык вокаль ансамбле эшли.

2015/2016 уку елында Александровка районының 3 мәктәбендә татар теле предмет буларак укытыла.