Хариуслар

6 төре билгеле, Евразия, Төньяк Америка елгаларында таралган.

Татарстан территориясендә бер төре – Европа хариусы (T. Thymallus) очрый. Чиста һәм салкын сулы елгаларда (Кама кушылдыклары: Лубян һәм Зәйнең югары агымында, шулай ук Кече Сөлчәдә) яши.

Гәүдәсенең озынлыгы 50-60 см, авырлыгы якынча 2 кг. Яшькелт-көрән төстә, ян-яклары соры, корсагы ак. Башы зур түгел. Тешләре үсеш алмаган. Сырт йөзгече, аеруча ата затларда, биек. Майлы йөзгече бар. 3-5 яшьтә җенси яктан өлгерәләр. Ата затлар аналарына караганда зуррак. Уылдыгын май аенда вак ташлы сай сулыкларда чәчә. Абсолют үрчемлелеге 250 дән 6 мең уылдык бөртегенә кадәр. Кысласыманнар, моллюсклар, балык уылдыклары, җир өсте һәм су кандалалары, коңгызлар белән туклана. 12 ел яши.

Промысел әһәмияте юк.

ТРның Кызыл китабына кертелгән.