Су ресурслары

ТРда – елга, күл, сусаклагыч, сазлык, буа, җир асты сулары, туфрак дымы, кар капламы сулары.

ТР су ресурсларының гомуми күләме (берьюлы куллану запасы) – елга (агым) сулары – 0,26 км³, күл – 0,028 км³, сусаклагыч (Куйбышев, Түбән Кама, Зәй, Карабаш сусаклагычларының тулы күләме) – 70,31 км³, буалар – 3,1 км³, актив су алмашы зоналарындагы җир асты сулары – 2,4 км³.

Берьюлы куллану запасыннан тыш су әйләнеше процессында өзлексез яңартылып торучы су ресурсларының запаслары бар, аларның төп өлешен җир асты, яңгыр һәм кар сулары тудырган елга агымы тәшкил итә. Күпьеллык күзәтүләр буенча ТР территориясендә формалашкан су агымының уртача еллык күләме 8,1 км³ тәшкил итә.

Су ресурслары ике төрле формада кулланыла: судан файдалану һәм суны куллану.

Судан файдалану су объектларыннан суны алмыйча гына бара (гидроэнергетика, су транспорты, балыкчылык, туризм).

Суны куллану аны су агымыннан яки җир асты сулары бассейнына әйләнеп кайтармаслык итеп, шулай ук сыйфаты үзгәртелгән суны өлешчә яки тулысы белән су алган урыннан үзгә җиргә кире кайтарырлык итеп алу белән бәйле.