Урсалы

Дала Зәе елгасының уң кушылдыгы.

Озынлыгы 26,6 км. Бассейнының мәйданы 358,4 км². Бөгелмә-Бәләбәй калкулыгыннан, Әлмәт районы территориясеннән ага. Елга башы Урсалыбаш авылыннан 2 км көнчыгыштарак, тамагы Яңа Нәдер авылыннан 1 км көньяк-көнчыгыштарак. Елга башының абсолют биеклеге 265 м, тамагыныкы – 98 м. Су җыелу мәйданының урманлылыгы 35%.

Урсалының 0,7 дән 21,1 км га кадәр озынлыктагы 11 кушылдыгы бар. Аеруча зурлары: Кама (21,1 км) – сул, Болгар (7,9 км) – уң кушылдыклар. Елга челтәренең тыгызлыгы 0,34 км/км². Туенуы катнаш, күбесенчә кар сулары исәбенә. Җир асты сулары белән туену модуле 1-3 л/с·км². Гидрологик режимы ташу вакытында су муллыгы һәм җәен нык саегуы белән характерлана. Бассейнда еллык су агымының уртача күпьеллык катламы 73 мм, ташу агымы катламы 55 мм. Язгы ташу, гадәттә, март ахырында башлана. Елга ноябрь уртасында туңа. Елга тамагында суының иң аз вакытындагы уртача күпьеллык чыгымы 0,027 м³/с.

Язын суы каты (6-9 мг-экв/л), кышын һәм җәен бик каты (9-12 мг-экв/л). Гомуми минеральләшүе язын 700-1000 мг/л, кышын һәм җәен 1000 мг/л дан күбрәк.