Мордвасу

Идел елгасының уң кушылдыгы.

Озынлыгы 18,7 км, бассейнының мәйданы 116,9 км². Елга башы Тәтеш районы Лаптевка авылыннан 4 км төньяк-көнбатыштарак, тамагы Кама Тамагы районы Кирельский посёлогы янында. Елганың түбән агымы Куйбышев сусаклагычы сулары астында калган һәм култыкка әйләнгән. Елга башының абсолют биеклеге 180 м, тамагыныкы — 53 м.

Су җыелу мәйданының урманлылыгы 10%. Мордвасуның 0,6 дан алып 5,6 км га кадәр озынлыктагы 14 кушылдыгы бар. Елга челтәренең тыгызлыгы 0,53 км/км². Туенуы катнаш, күбесенчә кар сулары исәбенә. Җир асты сулары белән туену модуле 0,1 л/с·км². Гидрологик режимы ташу вакытында су муллыгы һәм җәен нык саегуы белән характерлана. Бассейнда еллык су агымының уртача күпьеллык катламы 62 мм, ташу вакытында су катламы 50 мм. Язгы ташу, гадәттә, март ахырында башлана. Мордвасу ноябрь башында туңа. Елга тамагында суының иң аз вакытындагы уртача күпьеллык чыгымы 0,033 м³/с.

Язын суы чагыштырмача каты (3–6 мг-экв/л), кышын һәм җәен каты (6–9 мг-экв/л). Гомуми минеральләшүе язын 200–300 мг/л, кышын һәм җәен 500–700 мг/л.