Көрнәле инеше

Гәрәй елгасының (Мораса, Кече Чирмешән елгалары бассейны) уң кушылдыгы.

Озынлыгы 11,6 км, бассейнының мәйданы 44,2 км^2. Нурлат районы территориясеннән ага. Елга башы – урман массивында, Көрнәле Әмзә авылыннан 3,5 км төньяк-көнчыгыштарак, тамагы – Иске Әмзә авылы янында. Елга башының абсолют биеклеге 160 м, тамагыныкы – 113 м.

Көрнәле инешенең 3,3 км озынлыктагы кушылдыгы бар. Елга челтәренең тыгызлыгы 0,34 км/км². Туенуы катнаш, күбесенчә кар сулары исәбенә. Җир асты сулары белән туену модуле 0,26-0,5 л/с·км². Гидрологик режимы ташу вакытында су муллыгы һәм җәен нык саегуы белән характерлана. Бассейнда еллык су агымының уртача күпьеллык катламы 85 мм, ташу агымы катламы 80 мм. Язгы ташу, гадәттә, март ахырында башлана. Елга ноябрь уртасында туңа. Җәйге саегу вакытында елганың аерым урыннары кибә.

Суы бик каты: язын 9-12 мг-экв/л, кышын һәм җәен 20-40 мг-экв/л. Гомуми минеральләшүе язын 100-200 мг/л, кышын һәм җәен 500-700 мг/л.