Күннә

Югары Кандыз елгасының (Ык елгасы бассейны) сул кушылдыгы.

Озынлыгы 11,1 км, бассейнының мәйданы 40,5 км². Баулы районы территориясеннән ага. Елга башы – Салих авылында, тамагы – Шалты авылыннан 1,5 км көньяк-көнбатыштарак. Елга башының абсолют биеклеге 245 м, тамагыныкы – 124 м. Су җыелу мәйданының урманлылыгы 5%.

Күннәнең 0,3 км озынлыктагы 2 кушылдыгы бар. Елга челтәренең тыгызлыгы 0,29 км/км². Туенуы катнаш, күбесенчә кар сулары исәбенә. Җир асты сулары белән туену модуле 1,1-3 л/с·км². Гидрологик режимы ташу вакытында су муллыгы һәм җәен нык саегуы белән характерлана. Бассейнда еллык су агымының уртача күпьеллык катламы 94 мм, ташу агымы катламы 80 мм. Язгы ташу, гадәттә, апрельнең беренче ункөнлегендә башлана. Елга ноябрь ахырында туңа. Елга тамагында суының иң аз вакытындагы уртача күпьеллык чыгымы 0,02 м³/с.

Суы язын каты (6-9 мг-экв/л), кышын һәм җәен бик каты (9-12 мг-экв/л). Гомуми минеральләшүе язын 500-700 мг/л, кышын һәм җәен 1000 мг/л дан күбрәк.

Күннә елгасының сулъяк сөзәклегендә Салих тавы табигать истәлеге урнашкан.