Имәлле

Зөя елгасының сул кушылдыгы.

Озынлыгы 31 км, бассейнының мәйданы 147,1 км². Елга башы Кайбыч районы Кече Урсак авылыннан 4 км көньяк-көнбатыштарак, Апас районы территориясеннән ага, тамагы Кайбыч районы Яңа Патрикеево авылы янында. Елга башының абсолют биеклеге 160 м, тамагыныкы – 54 м. Су җыелу мәйданының урманлылыгы 23%.

Имәлленең 0,7 дән 8,4 км га кадәр озынлыктагы 9 кушылдыгы бар. Елга челтәренең тыгызлыгы 0,42 км/км².Күбесенчә кар сулары исәбенә туена. Җир асты туендыру модуле 0,1 л/с·км². Гидрологик режимы ташу вакытында су муллыгы һәм җәен нык саегуы белән характерлана. Елга түбәнге агымында кибә. Бассейнда еллык су агымының уртача күпьеллык катламы 60 мм, ташу вакытында агым катламы 57 мм. Язгы ташу, гадәттә, март ахырында башлана. Елга октябрь ахыры – ноябрь башында туңа. Елга тамагында суының иң аз вакытындагы уртача күпьеллык чыгымы 0,012 м³/с.

Суы уртача катылыкта (3-6 мг-экв/л), кышын һәм җәен каты (6-9 мг-экв/л). Гомуми минеральләшүе язын 200-300 мг/л, кышын һәм җәен 500-700 мг/л.

Имәлле бассейнында гомуми күләме 1,2 млн м³ булган 2 буа бар. Су ресурслары сугару өчен файдаланыла.