Кавал күлләре

Лаеш районы Комлы Кавал һәм Столбище авыллары арасында. 3 күлдән гыйбарәт: Кавал күле, Урта күл һәм Зимница күле. Алар тар гына (10-15 м) ермаклар белән тоташкан.

Су өслегенең мәйданы 128 га, шуның 11 га утраулар, анда хуҗалык бакчалары урнашкан. Күләме 4500 мең м³. Озынлыгы 4207 м, иң зур киңлеге 950 м, уртача тирәнлеге 3,4 м, иң зур тирәнлеге 13 м га якын.

Кавал күлләре карст-суффозия күренешләре нәтиҗәсендә реликт эрозияле үзәндә хасил була. Күлләр системасы калаклар формасында, меридиональ юнәлештә сузылган.

Туенуы катнаш, күбесенчә җир асты сулары исәбенә.

Суы җиңелчә минеральләшкән (53-67 мг/л), бик йомшак (0,3-0,7 мг-экв/л), җиңелчә болганчык (үтә күренмәлеге 35 см), гидрокарбонат-сульфат-кальцийлы типта.

Суда һәм су янында җир-су кырлачы, гади курак, елга камышы, үткен күрән, камышсыман кушбашак өстенлек итә.

Умырткасызларның сирәк төрләреннән су чаяны бар. Күл бакалары, гади тузбаш, кыр үрдәкләре яши.

Ял итү урыны. ТР табигать истәлеге (1978).