Елан күле

Идел-Кама саклаулыгының Раифа участогында, Яшел Үзән районы Бело-Безводный авылыннан көнчыгыштарак урнашкан.

Су өслегенең мәйданы 2,4 га, шулай итеп 2 га га якын мәйданны сазлык күрәне, камыш үсемлекләре биләп тора. Су күләме 28 мең м³. Озынлыгы 275 м, иң зур киңлеге 60 м, уртача тирәнлеге 1,1 м, иң зур тирәнлеге 2,5 м.

Күл карст-суффозия процесслары нәтиҗәсендә барлыкка килгән. Ярлары күтәренке (яр битләренең биеклеге 10-15 м), яр буенча киңлеге 5 тән 20 м га кадәр, урыны белән тигез диярлек сөзәклек сузыла.

Суы бик йомшак, саргылт төстә, болганчык, сульфат-гидрокарбонат-кальцийлы типта. Туенуы күбесенчә атмосфера явым-төшемнәре исәбенә. Күле ләмләнә, үлән белән каплана бара.

ТРның Кызыл китабына кертелгән үсемлекләрдән сары төнбоек, йөзгәләк, тәңкә яфраклар үсә.