Рәмиев Зөфәр Зәйни улы

1938 елның 25 июнендә Кама Тамагы районы Уразлы авылында туган.

Казан университетын тәмамлый (1967). 1970 елдан Тел, әдәбият һәм сәнгать институтында: текстология төркеме җитәкчесе (1976–2006), бер үк вакытта кулъязмалар һәм текстология бүлеге мөдире (1996–1997), директор урынбасары (2002–2004), текстология бүлеге мөдире (2007–2012), Язма һәм музыкаль мирас үзәгенең баш фәнни хезмәткәре (2014–2018), әдәбият белеме бүлегенең өлкән фәнни хезмәткәре (2019 елдан).

М.Гафури (1980, 1 т.; 1983, 3 т.), Ф.Әмирхан (1989, 3 т.), Н.Думави (1985), С.Сүнчәләй (2005), М.Җәлил (1–5 т., 2006), Г.Тукай (2006, 2 т.), Г.Сөнгати (2007) әсәрләрен басмага текстологик әзерләү эшендә катнаша, «Татар шигърияте (ХХ гасыр башы)» (2004) антологиясен төзи.

З.З.Рәмиев Гаяз Исхакыйның унбиш томлык (1998–2014; редколлегия әгъзасы, 6–15 томнарны төзүчеләрнең берсе һәм фәнни мөхәррире) һәм Габдулла Тукайның алты томлык (2016; редколлегия әгъзасы, төзүчеләрнең берсе, фәнни мөхәррир) академик басмаларын текстологик әзерләү белән җитәкчелек итә.

Г.Тукай, М.Гафури, Ф.Әмирхан, Г.Камал, С.Хәким, Ш.Маннур, Ә.Давыдов иҗатларына, текстология мәсьәләләренә, ХХ йөз башы татар әдәбиятына, туган төбәкне өйрәнүгә багышланган хезмәтләр авторы.

«Габдулла Тукай» энциклопедиясен төзү төркеме җитәкчесе (1996 елдан) һәм баш мөхәррире (2016).

Татарстан Республикасы Дәүләт бүләге лауреаты (2016). Медальләр белән бүләкләнә.

ХХ йөз башы татар әдәбияты: авторлык, төп текст һәм хронология мәсьәләләре. Казан, 2000;

Тукай һәм замандаш әдипләр. Казан, 2004;

Уразлы (Уразлино, Иске Каратай) авылы үткәненнән. Казан, 2004;

Әдәбиятчы-текстолог язмалары. Казан, 2014;

Текстология татарской литературы начала ХХ века. Казан, 2008.

Әдәбиятчы, текстолог Зөфәр Рәмиев. Казан, 2008.