Әхмәтҗанов Марат Халикъ улы

1932 елның 13 октябре, Казан шәһәре – 2010 елның августы, Новосибирск.

1956 елда Новосибирск тимер юл транспорты инженерлары институтын (хәзер Себер тимер юллар университеты) тәмамлый, шунда ук эшли. 1971 елдан – теоретик механика, 1984 елдан төзелеш механикасы кафедрасы мөдире, бер үк вакытта 1974–1983 елларда институт ректоры.

Хезмәтләре теоретик һәм гамәли механикага карый; конструкцияләрнең һәм машиналарның мөһим элементларындагы көчәнешләрне һәм деформацияләрне тикшерү өчен фотосыгылма каплам ысулын эшли. Тимер юл объектларының ныклыгы проблемасын тикшерә.

Дәүләт бүләге полярлаштыру – оптика ысулын үстерү буенча тикшеренүләр циклын эшләгәне өчен бирелә. «Почет билгесе» ордены, медальләр белән бүләкләнә.

Поляризационно-оптические методы механики деформируемого тела. М., 1973.

Сопротивление материалов. Новосибирск, 1997.

Основы прикладной теории упругости и пластичности. Новосибирск, 2000.