1970 елның 28 августында СССР Авыл хуҗалыгы министрлыгы приказы нигезендә Үзәк авыл хуҗалыгына агрохимик хезмәт күрсәтү институтының Казан филиалы буларак оештырыла, аның Идел-Вятка икътисади районының һәм Урта Идел буеның 4 өлкәсендә һәм 5 автоном республикасында эшчәнлек зоналары бар. 1982 елда Казан филиалы – Бөтенроссия авыл хуҗалыгын химияләштерү фәнни-тикшеренү һәм проект-технология институтының Казан филиалы, 1985 елда Бөтенроссия авыл хуҗалыгын химияләштерү фәнни-тикшеренү һәм проект-технология институтының (ВНИПТИХИМ) Идел-Вятка филиалы итеп үзгәртелә. 1997 елда филиал базасында "Плодородие" фәнни-тикшеренү станциясе" дәүләт унитар предприятиесе булдырыла, 2000 елда Россия Авыл  хуҗалыгы академиясенең Татарстан агрохимия һәм туфрак белеме фәнни-тикшеренү институты итеп үзгәртелә. 2014 елдан институт Федераль фәнни оешмалар агентлыгының ведомство карамагындагы учреждениесе, 2017 елдан хәзерге исемдә.

Татарстан агрохимия һәм туфрак белеме фәнни-тикшеренү  институты составында 5 бүлек эшли:

  • туфрак уңдырышлылыгын һәм үсемлекләр туклануын яңадан булдыру;
  • агроэкология һәм микробиология;
  • туфрак биологиясе;
  • игенчелектә һәм терлекчелектә био- һәм нанотехнологияләрне эшләү;
  • терлекчелек һәм ветеринария һәм агрохимия һәм биохимия анализлары лабораториясе.

Эшчәнлегенең төп юнәлешләре:

  • җирне ресурс саклау ысуллары белән эшкәрткәндә ашламаларның нәтиҗәле системаларын эшләү;
  • агрохимик һәм токсикологик анализлар нәтиҗәләре нигезендә туфрак уңдырышлылыгының үзгәрешен һәм аларның экологик торышын бәяләү;
  • адаптив-ландшафтлы игенчелектә ашламалар һәм җирле агрорудаларны комплекслы куллану, агрохимик чаралар белән авыл хуҗалыгы культураларының продукция процессы белән идарә итү алымнарын камилләштерү;
  • игенчелектә һәм үсемлекчелектә җирле агроминералларны куллануның яңа формаларын һәм ысулларын эшләү һәм булганнарын камилләштерү;
  • лаборатория, вегетация һәм кыр тәҗрибәләре шартларында гади тарттырылган һәм наноструктуралы агроминералларның йогынтысын өйрәнү;
  • техноген йогынтылы зонада экологик чиста авыл хуҗалыгы продукциясен алуның технологик алымнарын эшләү;
  • химияләштерү чараларын куллануның төрле системаларында туфракларның микробоценоз торышын фаразлау;
  • ашламаларның, биологик актив матдәләрнең, мелиорантларның, яңа буын биопреператларның, шулай ук нанотехнологияләр нигезендә булдырылган терлек азыгы өстәмәләренең яңа формаларын комплекслы куллану алымнарын эшләү буенча фәнни-тикшеренү эшләре.

2014–2019 елларда институт галимнәре тарафыннан 29 алым, ысул, технологияләр, 3 методика эшләнә, 18 монография, 445 фәнни мәкалә, шул исәптән 189 мәкалә рефератлана торган журналларда бастырыла. 31 патент алына, патент бирүгә 5 уңай карар бар.

"Алтын көз" бөтенроссия агросәнәгать күргәзмәсендә (2003−2016) институт эшләре 25 алтын, 18 көмеш һәм 8 бронза медаль белән билгеләнә. Институтның авторлар коллективы "Экологик чиста авыл хуҗалыгы продукциясен алу өчен наноструктуралы сорбент һәм абориген микроорганизмнар-деструкторлар консорциумы кулланып, нефть белән пычранган җирләрне рекультивацияләүнең инновацион технологияләрен эшләү һәм Татарстан Республикасы территориясендә гамәлгә кертү" эше өчен фән һәм техника өлкәсендә ТР Дәүләт бүләгенә лаек була (2014).

Татарлар турында

Милли аш-су