Үтәнгеш

Авыл XVIII йөз уртасында Новопоселённый Починок по речке Утенгиш буларак нигезләнә. XVIII йөздә – XIX йөзнең беренче яртысында дәүләт крәстияннәре катлавына керә (элекке ясаклы татарлар). Бу чорда халкының төп шөгыле – игенчелек һәм терлек асрау, чабата үрү, олаучылык кәсепчелеге таралган була.

1893 елда мәхәллә оештырыла һәм мәчет салына (беренче имам-хатибы – Ә.Камалетдинов).

XX йөз башында шулай ук мәктәп (1909 елда 24 ир бала һәм 17 кыз бала укый), вак-төякләр кибете эшли. Бу чорда авыл җәмәгатенең имана җире 238,8 дисәтинә тәшкил итә.

1920 елга кадәр авыл Казан губернасының Казан өязе Кукмара волостена керә. 1920 елдан ТАССРның Арча кантонында. 1930 елның 10 августыннан — Дөбъяз, 1938 елның 4 августыннан — Юдино, 1958 елның 16 июленнән Яшел Үзән районында.

Хәзер Олы Җәке авыл җирлеге составына керә.

1957 елдан авыл − “Ключи” кошчылык (үзәк утары Большие Ключи авылында), 1970 елдан “Уразлы” җимеш-яшелчәчелек совхозлары (үзәк утары Олы Җәке авылында, 1994 елдан күмәк предприятие, 2001−2013 елларда ”Уразлы” җаваплылыгы чикләнгән җәмгыять) составында.

1782 елда — 9 ир заты;
1859 елда — 112,
1897 елда — 198,
1908 елда — 221,
1920 елда — 208,
1926 елда — 293,
1938 елда — 296,
1949 елда — 300,
1958 елда — 249,
1970 елда — 215,
1979 елда — 138,
1989 елда — 52,
2002 елда — 32,
2010 елда — 13,
2017 елда — 14 кеше (татарлар).