Өмбе

1602–1603 еллардан мәгълүм. XVIII йөз – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук умартачылык, тегүчелек кәсепчелеге тарала.

ХХ йөз башында авылда мәчет (1842 елда төзелә), мәктәп, 1 тукымалар һәм1 вак-төякләр кибете, тире-күн склады, 10 олаучылар йорты эшли. Авыл җәмәгатенең имана җире 535,4 дисәтинә тәшкил итә.

1920 елга кадәр авыл Казан губернасының Казан өязе Мүлмә волостена керә. 1920 елдан – ТАССРның Арча кантонында. 1930 елның 10 августыннан – Дөбъяз, 1963 елның 1 февраленнән – Яшел Үзән, 1965 елның 12 гыйнварыннан – Биектау районында.

Хәзер Ташлы Кавал авыл җирлегендә.

1931 елда авылда “Кызыл юл” колхозы оештырыла. 1951 елда колхоз “Кызыл байрак” колхозына кушыла (колхоз идарәсе Ташлы Кавал авылында урнаша). 1995 елдан – “Юлдаш” авыл хуҗалыгы җитештерү кооперативы, хәзер – “Бөреле” ябык акционерлык җәмгыяте эшли.

Халкы кырчылык һәм терлекчелек белән шөгыльләнә.

Авылда клуб (бинасы 1984 елда төзелә), китапханә (1954 елдан), “Изге азан” мәчете (2016 елдан) эшли.

А.Ә.Харисова (1925– 2011) – 1949 елдан – Татар дәүләт республика күчмә театры (хәзер К.Тинчурин исемендәге Татар дәүләт драма һәм комедия театры), 1950 елдан – Г.Камал исемендәге Татар дәүләт академия театры актрисасы, ТАССРның атказанган артисты.

1782елда – 24 ир-ат;
1859 елда – 240,
1897 елда – 385,
1908 елда – 509,
1920 елда – 509,
1926 елда – 469,
1938 елда – 511,
1949 елда – 472,
1958 елда – 379,
1970 елда – 314,
1989 елда – 193,
2002 елда – 145,
2010 елда – 158,
2017 елда – 146 кеше (татарлар).