Рус-Татар Әйшәсе

1991 елда Рус Әйшәсе (XVIII йөзнең икенче яртысында нигезләнә) һәм Татар Әйшәсе (Казан ханлыгы чорыннан мәгълүм) авыллары кушылу нәтиҗәсендә барлыкка килә.

1861 елгы реформага кадәр Рус Әйшесе авылы халкы – алпавыт, Татар Әйшесе халкы – дәүләт крәстияннәре катлавына керә. Бу чорда халкының төп шөгыльләре – игенчелек һәм терлекчелек, шулай ук умартачылык, йон-тукыма ману, он тарту, прәннек пешерү кәсепчелеге тарала.

ХХ йөз башында авылда 2 җил тегермәне, ярма яргыч, тимерчелек, 2 мануфактура һәм 1 бакалея кибете эшли. Авыл җәмәгатенең имана җире 518,1 дисәтинә (Татар Әйшесендә – 227,7 дисәтинә) тәшкил итә.

1920 елга кадәр ике авыл да Казан губернасының Казан өязе Чыпчык волостена керә. 1920 елдан – ТАССРның Арча кантонында. 1930 елның 10 августыннан – Дөбъяз, 1935 елның 10 февраленнән – Биектау, 1963 елның 1 февраленнән – Яшел Үзән, 1965 елның 12 гыйнварыннан – Биектау районында.

Хәзер Ташлы Кавал авыл җирлегендә.

1931 елда авылда “Заря” колхозы оештырыла. 1950 елдан – “Татарстан” колхозы (колхоз идарәсе Мүлмә авылында урнаша), 1995 елдан – “Татарстан” күмәк предприятиесе эшли.

Халкы кырчылык һәм терлекчелек белән шөгыльләнә.

Авыл янында 3 кабер ташы (XVI йөзнең беренче яртысы) табыла.

А.М.Понятов (1892 – 1980) магнитлы аудио- һәм видеоязмалар өлкәсендә күп кенә инновацияләр керткән электроинженер, 1920 еллар ахырыннан АКШта яши; Америка кино һәм телевидение инженерлары җәмгыяте тарафыннан Понятов исемендәге алтын медаль булдырыла (1982).

1782 елда Татар Әйшесендә – 148 ир-ат;
1859 елда (Татар Әйшесендә) – 144, (Рус Әйшесендә) – 364;
1897 елда – 155 (344),
1908 елда – 119 (293),
1920 елда – 121 (286),
1926 елда – 123 (367),
1938 елда – 202,
1949 елда – 592 (152),
1958 елда – 473 (63),
1989 елда – 71,
2002 елда – 46,
2010 елда – 31,
2017 елда – 28 кеше (татарлар – 52%, руслар – 48%).