Казаклар

XVIII йөзнең беренче яртысында нигезләнә. Революциягә кадәрге чыганакларда Уразлы исеме белән дә мәгълүм.

XVIII йөз – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук колмак үстерү, сәүдә кәсепчелеге тарала.

XVIII йөз ахырында авылда мәчет, поташ заводы, ХХ йөз башында – тимерчелек, җил тегермәне, 1 бакалея һәм 3 вак-төякләр кибете эшли.

Авыл җәмәгатенең имана җире 1855 дисәтинә тәшкил итә.

1920 елга кадәр авыл Казан губернасының Царёвококшайск (1919 елдан – Краснококшайск) өязе Күлле Киме волостена керә. 1920 елдан – ТАССРның Арча кантонында. 1930 елның 10 августыннан – Дөбъяз, 1963 елның 1 февраленнән – Яшел Үзән, 1965 елның 12 гыйнварыннан – Биектау районында.

Хәзер Казаклар авыл җирлеге үзәге.

1931 елда авылда “Алан” колхозы оештырыла. Соңрак “Коммунизм” колхозы (1966 елгы мәгълүматлар буенча, колхоз идарәсе Өлә авылында, 1986 елгы мәгълүматлар буенча – Казаклар авылында урнаша), 1995 елдан – “Алан” авыл хуҗалыгы җитештерү кооперативы, хәзер – “Аланлык” крестьян-фермер хуҗалыгы эшли. Халкы кырчылык һәм терлекчелек белән шөгыльләнә.

1927 елда авылда башлангыч мәктәп ачыла, 1931 елда – җидееллык, 1963 елда – тулы булмаган урта, 1998 елда – урта, 2013 елда – тулы булмаган урта мәктәп итеп үзгәртелә.

“Карлыгач” балалар бакчасы (1956 елдан), мәдәният йорты (1955 елдан; 2019 елда яңа бина төзелә), китапханә (1956 елдан), “Мөхәммәтхафиз” мәчете (1993 елдан); мәктәп каршында – “Туган якны өйрәнү” музее (2007 елдан; 1967 елдан музей-почмак, җитәкчесе – Г.А.Сабирҗанова), мәдәният йорты каршында – “Гөлләр” театр коллективы (1999 елдан) эшли.

Э.Р.Сабирҗанов (1988 елда туган) – җырчы, “Созвездие – Йолдызлык” эстрада сәнгате фестивале, Р.Ваһапов исемендәге татар җыры конкурсы (2013 ел), Яшь башкаручыларның халыкара “Татар моңы” конкурсы (2014 ел) һ.б. лауреаты.

1859 елда – 1267,
1897 елда – 1065,
1908 елда – 1176,
1928 елда – 1186,
1938 елда – 1005,
1949 елда – 658,
1958 елда – 614,
1970 елда – 550,
1989 елда – 449,
2002 елда – 232,
2010 елда – 208,
2017 елда – 221 кеше (татарлар – 95%, руслар – 5%).