Глухово

Революциягә кадәрге чыганакларда шулай ук Черкас-Андреево, Андреевский буларак та мәгълүм.

Авыл XVII йөзнең икенче яртысында алпавыт Т.Глухов тарафыннан нигезләнә. Соңрак бирнә сыйфатында Глуховның кияве Я.Левашовка тапшырыла; крепостной хокук гамәлдән чыгарыр алдыннан, 1861 елда, 60 ир-ат һәм 455 дисәтинә җир генерал-майор П.А.Апехтин милке исәпләнә. Халыкның бу вакыттагы төп шөгыльләре – игенчелек һәм терлекчелек.

1775 елда авылда җирле алпавыт, 1768–1774 еллардагы Рус-төрек сугышында катнашкан А.И.Елецкий иганәсенә агачтан Андрей Первозванный чиркәве салына (2011 елда яна).

XIX йөзнең икенче яртысында авылда ярма яргыч; 1887–1897 елларда земство мәктәбе (алпавыт А.Н.Апехтин биргән йортта урнаша) эшли, балалар саны аз булу сәбәпле, Олы Пүчинкә авылына күчерелә.

1920 елга кадәр авыл Казан губернасының Казан өязе Мүлмә волостена керә. 1920 елдан ТАССРның Арча кантонында. 1930 елның 10 августыннан –Дөбъяз, 1963 елның 1 февраленнән – Яшел Үзән, 1965 елның 12 гыйнварыннан – Биектау районында.

Хәзер Ташлы Кавал авыл җирлегендә.

1859 елда – 300,
1897 елда – 282,
1908 елда – 275,
1920 елда – 285,
1926 елда – 347 кеше;
1989 елдан даими яшәүчеләр юк.