- РУС
- ТАТ
Татарстанның Биектау районындагы авыл. Касыйм елгасы буенда, Биектау тимер юл станциясе поселогыннан 20 км төньяктарак урнашкан
Казан ханлыгы чорында нигезләнә. Революциягә кадәрге чыганакларда Торнаяз исеме белән дә мәгълүм.
XVIII йөз – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук умартачылык, өс һәм күн аяк киемнәре тегү, олаучылык кәсепчелеге тарала.
ХХ йөз башында мәчет (1871 елда төзелә), мәдрәсә, тимерче алачыгы, 3 вак-төякләр кибете эшли. Авыл җәмәгатенең имана җире 1539,4 дисәтинә тәшкил итә.
1920 елга кадәр авыл Казан губернасының Казан өязе Салкын Чишмә волостена керә. 1920 елдан – ТАССРның Арча кантонында. 1930 елның 10 августыннан – Дөбъяз, 1963 елның 1 февраленнән – Яшел Үзән, 1965 елның 12 гыйнварыннан – Биектау районында.
Хәзер Каенлык авыл җирлегендә.
Авылда Киров исемендәге колхоз (колхоз идарәсе авылда урнаша), “Агро-Холдинг” җаваплылыгы чикләнгән җәмгыяте (2011 елдан) эшли.
Халкы кырчылык һәм терлекчелек белән шөгыльләнә.
1930 елларда авылда башлангыч мәктәп ачыла (элекке мәчет бинасында урнаша), 1992 елда – тулы булмаган урта, 1995 елда – урта (1996 елда яңа бина төзелә), 2011 елда – башлангыч мәктәп итеп үзгәртелә.
Авылда шулай ук мәдәният йорты, “Салават күпере” балалар бакчасы (икесе дә – 1965 елдан), китапханә (1990 елдан), фельдшер-акушерлык пункты, мәчет (2003 елдан); мәдәният йорты каршында “Әкият” театр коллективы (2010 елдан) эшли.
Төзекләндерелгән “Илһам” чишмәсе бар.
Авыл зиратында эпиграфика истәлеге – кабер ташы (XVI йөзнең беренче яртысы) табыла.
1782 елда – 187 ир-ат;
1859 елда – 672,
1897 елда – 850,
1908 елда – 949,
1920 елда – 919,
1926 елда – 1045,
1938 елда – 912,
1949 елда – 589,
1958 елда – 498,
1970 елда – 473,
1989 елда – 346,
2002 елда – 352,
2010 елда – 322,
2017 елда – 308 кеше (татарлар – 94%).
Вы используете устаревшую версию браузера.
Для корректного отображения сайта обновите браузер.