Олы Пүчинкә

XVII йөзнең беренче яртысында нигезләнә. Революциягә кадәрге рус чыганакларында Лубяной Мост исеме белән дә мәгълүм.

XVIII йөз – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук киез итек-киез басу һәм тукучылык кәсепчелеге тарала.

1897 елда земство училищесы ачыла (укытучы Г.И.Андреев тәкъдиме белән Глухово авылыннан күчерелә; 1903 елда яңа бина төзелә; сакланган).

ХХ йөз башында авылда земство училищесы, 2 тегермән, 5 вак-төякләр кибете эшли. Авыл җәмәгатенең имана җире 1210,7 дисәтинә тәшкил итә.

1920 елга кадәр авыл Казан губернасының Казан өязе Алат волостена керә. 1920 елдан – ТАССРның Арча кантонында. 1930 елның 10 августыннан – Дөбъяз, 1963 елның 1 февраленнән – Яшел Үзән, 1965 елның 12 гыйнварыннан – Биектау районында.

Хәзер Каенлык авыл җирлегендә.

2000 елдан авылда “Красная Заря” авыл хуҗалыгы җитештерү кооперативы эшли. Халкы кырчылык һәм терлекчелек белән шөгыльләнә.

2011 елга кадәр – башлангыч мәктәп, 2005 елга кадәр – китапханә эшли.

А.А.Захарова (1950 елда туган) – “Серп и молот” җаваплылыгы чикләнгән җәмгыяте җитәкчесе (1988 елдан), ТАССРның атказанган икътисадчысы, ТРның атказанган авыл хуҗалыгы хезмәткәре.

1763 елда – 230 ир-ат;
1859 елда – 413,
1897 елда – 450,
1908 елда – 632,
1920 елда – 494,
1938 елда – 524,
1949 елда – 339,
1958 елда – 254,
1970 елда – 247,
1989 елда – 108,
2002 елда – 113,
2010 елда – 94,
2017 елда – 83 кеше (руслар – 99%, мордвалар – 1%).