Яңа Юл

Поселок 1924 елда нигезләнә. Баштагы атамасы – Шуро (1930 елларның икенче яртысына кадәр).

Оештырылган вакытыннан – Тәмте, 1958 елның 16 июленнән – Югары Ослан, 1963 елның 1 февраленнән – Зеленодольск, 1965 елның 12 гыйнварыннан Югары Ослан районында.

Хәзер Шылаңгы авыл җирлеге составына керә.

Күмәкләштерү елларында поселокта “Яңа Юл” колхозы оештырыла, 1950 елдан – “Кызыл Татарстан” колхозы (Берек авылы), 1957 елдан “Луч Октября” колхозы (Шылаңгы авылы) составына керә (1970 елда “Луч Октября” совхоз итеп үзгәртелә; 1992–2010 елларда – “Казаньоргсинтез” гаммәви акционерлык җәмгыятенең “Луч Синтез” ярдәмче хуҗалыгы).

Халкы “Югары Ослан” агрофирмасы” җаваплылыгы чикләнгән җәмгыятендә үсемлекчелек белән шөгыльләнә.

1970 еллардан 2008 елга кадәр башлангыч мәктәп эшли.

Поселокта клуб, фельдшер-акушерлык пункты бар. Клуб каршында “Ак каен” (2003 елдан) фольклор коллективы эшли.

1938 елда – 266,
1949 елда – 278,
1958 елда – 221,
1970 елда – 272,
1979 елда – 159,
1989 елда – 102,
2002 елда – 118,
2010 елда – 111,
2017 елда – 116 кеше (татарлар).