Юлтимер

XVIII йөзнең беренче яртысында нигезләнә. 1860 елларга кадәр халкы дәүләт крестьяннары һәм типтәрләр катлауларына бүленә. Бу чорда халкының төп шөгыльләре – игенчелек һәм терлекчелек.

XX йөз башында мәчет (1939 елда ябыла, бинасы мәктәпкә тапшырыла), мәктәп, икмәк саклау-сату кибете, бакалея кибете эшли.

Авыл җәмәгатенең имана җире 858 дисәтинә тәшкил итә.

1920 елга кадәр авыл Уфа губернасының Минзәлә өязе Язикәү волостена керә.

1920 елдан – ТАССРның Минзәлә, 1921 елдан – Чаллы кантонында. 1930 елның 10 августыннан – Сарман районында.

Хәзер – Азалак авыл җирлегендә.

1930 елда «Кызыл буразна» колхозы оештырыла. 1959 елда «1 Май» (үзәк утары – Азалак авылы) һәм «Самолёт» (үзәк утары – Шыгай авылы) колхозлары белән бергә «1 Май» исеме астында берләштереләләр (үзәк утары – Азалак авылы).

1995–2002 елларда авылда – «Уңыш» күмәк предприятиесе, 2003–2005 елларда – шул ук исемдәге авыл хуҗалыгы җитештерү кооперативы, 2006 елдан «Юлтимер» агрофирмасы, 2013–2019 елларда кирпеч заводы эшли.

Хәзерге вакытта 3 крестьян-фермер хуҗалыгы бар. Халкы башлыча кырчылык һәм терлекчелек белән шөгыльләнә.

1928 елда башлангыч мәктәп ачыла (1972 елда яңа бина төзелә), 1994 елда тулы булмаган урта мәктәп итеп үзгәртелә, 2015 елдан – Зур Нөркәй урта мәктәбе филиалы.

Авылда мәдәният йорты (1986 елда яңа бина төзелә), китапханә (1992 елдан), балалар бакчасы (1954 елдан), модуль фельдшер-акушерлык пункты (2021 елдан), мәчет (1994 елдан) бар.

Мәдәният йорты каршында «Ләйсән» фольклор ансамбле, «Сердәш» вокаль, «Сәхнә утлары» театр, «Шомба бас» хореография коллективлары эшли.

Ә.Г.Абдуллин (1941 елда туган) – нефтьче, СССР Дәүләт бүләге лауреаты, Октябрь Революциясе ордены кавалеры, исеме Әлмәт шәһәре урамнарының берсенә бирелә;

Ф.Г.Габделхаков (1921–1982) – капитан, Бөек Ватан сугышы ветераны, Александр Невский, беренче һәм икенче дәрәҗә Бөек Ватан сугышы, Кызыл Йолдыз орденнары кавалеры.

1870 елда – 505,
1897 елда – 857,
1906 елда – 990,
1920 елда – 855,
1926 елда – 708,
1938 елда – 764,
1949 елда – 588,
1958 елда – 513,
1970 елда – 517,
1979 елда – 401,
1989 елда – 275,
2002 елда – 305,
2010 елда – 307,
2021 елда – 277 кеше (татарлар).