Урта Кәшер

XVIII йөзнең икенче яртысында нигезләнә. Революциягә кадәрге чыганакларда Кәшербаш исеме белән дә искә алына.

XVIII йөздә – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында авылда мәчет, мәдрәсә, мәктәп эшли. Авыл җәмәгатенең имана җире 529,3 дисәтинә тәшкил итә.

1920 елга кадәр авыл Уфа губернасының Минзәлә өязе Иске Кәшер волостена керә. 1920 елдан – ТАССРның Минзәлә, 1921 елдан – Чаллы кантонында. 1930 елның 10 августыннан – Сарман районында.

Хәзер – Иске Кәшер авыл җирлегендә.

1931 елда «Кызыл игенче» колхозы оештырыла. 1957 елда исеме «Дружба» колхозы дип үзгәртелә, 1962 елда берләштерелгән «Искра» колхозына кушыла (үзәк утары – Иске Кәшер авылы).

1993 елдан авылда –мөстәкыйль «Алга» колхозы (шул ук елда исеме «Игенче» колхозы дип үзгәртелә), 1994 елдан – «Игенче», 1999–2002 елларда – «Кәшер» күмәк предприятиеләре, 2003–2005 елларда – «Кәшер» авыл хуҗалыгы җитештерү кооперативы, 2006 елдан агрофирма эшли.

Халкы башлыча кырчылык һәм сөт терлекчелеге белән шөгыльләнә.

1921–1937 елларда – балалар йорты, 2010 елга кадәр башлангыч мәктәп эшли.

Авылда мәдәният йорты (1983 елда яңа бина төзелә), китапханә (1985 елдан), фельдшер-акушерлык пункты (мәдәният йорты бинасында), «Илдус» мәчете (2018 елдан) бар.

Мәдәният йортында «Ак калфак» фольклор коллективы эшли (2015 елдан).

Р.Ә.Гыйззәтуллин (1955–2011) – язучы, журналист, Татарстан Республикасының атказанган мәдәният хезмәткәре.

1834 елда – 100,
1870 елда – 233,
1920 елда – 612,
1926 елда – 464,
1938 елда – 492,
1949 елда – 467,
1958 елда – 356,
1970 елда – 372,
1979 елда – 277,
1989 елда – 197,
2002 елда – 199,
2010 елда – 191,
2021 елда – 169 кеше (татарлар).