Петровка

XVIII йөзнең икенче яртысында нигезләнә. 1860 елларга кадәр халкы алпавыт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында авылда башлангыч мәктәп (1905) эшли. Авыл җәмәгатенең имана җире 542,6 дисәтинә тәшкил итә.

1920 елга кадәр авыл Уфа губернасының Минзәлә өязе Александр-Кармалы волостена керә.

1920 елдан – ТАССРның Минзәлә, 1922 елдан – Чаллы кантонында. 1930 елның 10 августыннан – Сарман районында.

Хәзер – Кәүҗияк авыл җирлегендә.

1931 «Красная Горка» колхозы оештырыла. 1953 елда «Сталин юлы» колхозына кушыла (үзәк утары – Кәүҗияк авылы), 1959 елда хуҗалыкның исеме «Коммунизм» колхозы дип үзгәртелә. 1991 елдан авылда – мөстәкыйль «Красная Горка» совхозы, 1995–1997 елларда – шул ук исемдәге күмәк предприятие, 1998–2002 елларда җаваплылыгы чикләнгән җәмгыяте эшли.

Халкы башлыча кырчылык һәм дуңгызлар асрау белән шөгыльләнә.

1920 елларда башлангыч мәктәп ачыла, 1947 елда – җидееллык, 1958 елда тулы булмаган урта мәктәп (яңа бина төзелә) итеп үзгәртелә, 2008 елда ябыла.

2008 елга кадәр балалар бакчасы эшли.

1870 елда – 250,
1897 елда – 583,
1920 елда – 673,
1926 елда – 632,
1938 елда – 248,
1949 елда – 441,
1958 елда – 362,
1970 елда – 252,
1979 елда – 122,
1989 елда – 48,
2002 елда – 104,
2010 елда – 80,
2021 елда – 75 кеше (руслар – 45%, таҗиклар – 43%, татарлар – 12%).