Яңа Имән

1880 елларда Иске Имән авылыннан чыгучылар тарафыннан нигезләнә. Революциягә кадәрге чыганакларда шулай ук Ново-Иманово, Ново-Имяково исемнәре белән дә искә алына.

1860 елларга кадәр халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында авылда мәчет, мәктәп эшли. Авыл җәмәгатенең имана җире 670,3 дисәтинә тәшкил итә.

1920 елга кадәр авыл Уфа губернасының Минзәлә өязе Иске Кәшер волостена керә.

1920 елдан – ТАССРның Минзәлә, 1922 елдан – Чаллы кантонында. 1930 елның 10 августыннан – Сарман районында.

Хәзер – Яңа Имән авыл җирлегендә.

1933 «Авангард» колхозы оештырыла. 1950 елда Таза Чишмә авылы белән бергә – «Кызыл Октябрь» колхозына (үзәк утары – Күтәмәле авылы), 1963 елда берләштерелгән «Родина» колхозына (үзәк утары – Күтәмәле авылы, 1992 елдан үзәк утары – Яңа Имән авылы) кушыла.

1995–2002 елларда авылда – «Родина» күмәк предприятиесе, 2003–2005 елларда шул ук исемдәге авыл хуҗалыгы җитештерү кооперативы эшли. Хәзерге вакытта 2 крестьян-фермер хуҗалыгы бар.

Халкы башлыча кырчылык белән шөгыльләнә.

2010 елга кадәр башлангыч мәктәп эшли.

Авылда мәдәният йорты (1980 елда яңа бина төзелә), фельдшер-акушерлык пункты (1980 елдан), мәчет, шулай ук төзекләндерелгән «Мәхмүр Рәхмәт» һәм «Зиннур» чишмәләре бар.

1902 елда – 348 ир-ат;
1920 елда – 738,
1926 елда – 525,
1938 елда – 602,
1949 елда – 442,
1958 елда – 379,
1970 елда – 385,
1979 елда – 313,
1989 елда – 199,
2002 елда – 215,
2010 елда – 210,
2021 елда – 208 кеше (татарлар).