Туктар

1664 елдан Саба исеме белән мәгълүм. Революциягә кадәрге чыганакларда шулай ук Иске Саба буларак та искә алына.

XVIII йөздә – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында авылда мәчет, мәктәп, су тегермәне, 2 вак-төякләр кибете эшли. Авыл җәмәгатенең имана җире 621,3 дисәтинә тәшкил итә.

1920 елга кадәр авыл Казан губернасының Мамадыш өязе Сатыш волостена керә.

1920 елдан – ТАССРның Мамадыш кантонында. 1930 елның 10 августыннан – Саба районында.

Хәзер – Килдебәк авыл җирлегендә.

Күмәкләштерүнең беренче елларында Октябрьнең 12 еллыгы исем. колхоз оештырыла. 1960 елдан авылда – «Октябрь» колхозы (үзәк утары – Килдебәк авылы), 1994 елдан шул ук исемдәге күмәк предприятие эшли. 2011 елдан К.Ш.Вәлиев крестьян-фермер хуҗалыгы бар (умартачылык).

Халкы башлыча кырчылык һәм терлекчелек белән шөгыльләнә.

Авылда клуб, китапханә, «Тамчы» балалар бакчасы (2002 елдан), фельдшер-акушерлык пункты, мәчет (торгызыла) бар.

2015 елда клуб каршында «Гәрәбә» фольклор коллективы оештырыла.

Т.Н.Шәрәфетдинова (Тәслимә Низами) (1956 елда туган) – шагыйрә, композитор, җырчы, татар телендәге популяр җырлар авторы, Татарстан Республикасының атказанган артисты.

1782 елда – 37 ир-ат;
1859 елда – 198,
1897 елда – 347,
1908 елда – 490,
1920 елда – 566,
1926 елда – 602,
1938 елда – 576,
1949 елда – 312,
1970 елда – 400,
1979 елда – 354,
1989 елда – 129,
2002 елда – 280,
2010 елда – 292,
2020 елда – 268 кеше (татарлар).