Татар Икшермәсе

1680 елдан мәгълүм. Революицягә кадәрге чыганакларда Икшермә исеме белән искә алына.

XVIII йөздә – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек.

XX йөз башында авылда 2 мәчет, мәктәп, су тегермәне һәм вак-төякләр кибете эшли. Авыл җәмәгатенең имана җире 1521,8 дисәтинә тәшкил итә.

1920 елга кадәр авыл Казан губернасының Мамадыш өязе Әбде волостена керә.

1920 елдан – ТАССРның Мамадыш кантонында. 1930 елның 10 августыннан – Саба районында.

Хәзер – Иске Икшермә авыл җирлегендә.

Күмәкләштерү елларында Сталин исем. колхоз II оештырыла (беренче рәисе – Низамиев). 1960–1997 елларда авылда «Икшурминский» совхозы (үзәк утары – Иске Икшермә авылы), 2011 елдан Ф.З.Мөхәммәтшин крестьян-фермер хуҗалыгы эшли (сөтчелек фермасы).

Халкы башлыча кырчылык һәм терлекчелек белән шөгыльләнә.

Авылда «Кояшкай» балалар бакчасы (Иске Икшермә балалар бакчасы филиалы), клуб (1999 елда яңа бина төзелә), фельдшер-акушерлык пункты, «Хаҗип» мәчете (1995 елдан), шулай ук төзекләндерелгән «Ильяс» һәм «Якуб» чишмәләре бар. Клуб каршында 2005 елда – «Нур» һәм 2017 елда «Самоцветы» фольклор ансамбльләре оештырыла.

М.Х.Салихов (1965 елда туган) – Татарстан Республикасының атказанган төзүчесе, икътисадад фәннәре кандидаты;

А.Р.Тимербаев (1971 елда туган) – композитор, автор-башкаручы, продюсер, Татарстан Республикасының атказанган артисты.

1782 елда – 108 ир-ат;
1859 елда – 637,
1897 елда – 952,
1908 елда – 1026,
1920 елда – 1040,
1926 елда – 1141,
1938 елда – 689,
1949 елда – 540,
1970 елда – 562,
1979 елда – 483,
1989 елда – 403,
2002 елда – 331,
2010 елда – 269,
2020 елда – 258 кеше (татарлар).