Мамалай

1680 елдан мәгълүм. XVIII йөздә – XIX йөзнең беренче яртысында халкы дәүләт крестьяннары катлавына керә. Бу чорда халкының төп шөгыльләре – игенчелек һәм терлекчелек, шулай ук баш киемнәре тегү тарала.

XX йөз башында авылда мәчет, тимерчелек, ярма яргыч, 4 вак-төякләр кибете эшли. Авыл җәмәгатенең имана җире 1069,9 дисәтинә тәшкил итә.

1920 елга кадәр авыл Казан губернасының Мамадыш өязе Елыш волосте үзәге була.

1920 елдан – ТАССРның Мамадыш кантонында. 1930 елның 10 августыннан – Саба районында.

Хәзер – Сатыш авыл җирлегендә.

«Кызыл яшьләр» колхозы оештырыла (беренче рәисе – С.Миңнегулов). 1995 елга кадәр «беренче Май» колхозына керә (үзәк утары – Югары Шытсу авылы), соңрак авыл аерым «Мамалай» колхозы булып бүленеп чыга.

1996 елдан соң авылда – «Мамалай», 2003 елга кадәр – «Марс» (үзәк утары – Сатыш авылы) күмәк предприятиеләре, 2003–2005 елларда – «Марс» крестьян-фермер хуҗалыгы, 2015 елдан «Саба» җаваплылыгы чикләнгән җәмгыятенең «Сатыш» филиалы эшли.

Халкы башлыча кырчылык һәм терлекчелек белән шөгыльләнә.

Элек башлангыч мәктәп эшли.

Авылда клуб, «Кояшкай» балалар бакчасы (2010 елдан), фельдшер-акушерлык пункты, мәчет (2010 елдан) бар.

Авыл янында археология истәлекләре – Мамалай табылдыгы (бронза гасырның соңгы чоры), Мамалай авыллыгы (Алтын Урда, Казан ханлыгы чорлары һәм соңрак дәвер), соңгы болгар чоры һәм татар керамикасы ачыклана.

1782 елда – 48 ир-ат;
1859 елда – 447,
1897 елда – 842,
1908 елда – 950,
1920 елда – 859,
1926 елда – 765,
1938 елда – 728,
1949 елда – 494,
1970 елда – 409,
1979 елда – 439,
1989 елда – 288,
2002 елда – 223,
2010 елда – 227,
2020 елда – 223 кеше (татарлар).